ABŞ müdafiə naziri Pit Heqsetin imzaladığı memorandum Avropadakı hərbi rotasiya və raket yerləşdirmə planlarına təsir göstərib...
Pit Heqset tərəfindən imzalanmış yeni memorandum əsasında Avropada yerləşdirilməsi planlaşdırılan ABŞ istehsalı “Tomahawk” raketləri ilə bağlı proqram dayandırılıb.
Poliqon xəbər verir ki, bu barədə CNN telekanalı mənbələrə istinadən məlumat yayıb.
Məlumata görə, sənəd çərçivəsində ABŞ ordusunun 1-ci Süvari Diviziyasının 2-ci Zirehli Briqada Döyüş Qrupunun planlaşdırılmış rotasiyası da ləğv olunub. Həmin hərbi birləşmənin Polşa, Baltik ölkələri və Rumıniyada yerləşdirilməsi nəzərdə tutulurdu. Yeni qərarla birlikdə Avropada artıq yerləşən briqada hərbçilərinin bir hissəsinin ABŞ-yə geri qaytarılması planlaşdırılır.
“Tomahawk” raketləri ABŞ ordusunun ən mühüm uzaqmənzilli dəqiq zərbə sistemlərindən biri hesab olunur. Ekspertlərin fikrincə, bu raketlərin Avropaya yerləşdirilməsi NATO-nun şərq cinahında çəkindirici gücün artırılması baxımından xüsusi əhəmiyyət daşıyırdı. Mənbələr bildirirlər ki, Avropa ölkələrinin hazırda bu sistemə tam uyğun alternativləri yoxdur.
Qərarın NATO daxilində müəyyən narahatlıq yaratdığı qeyd olunur. Son illərdə ABŞ Şərqi Avropa regionunda hərbi iştirakını gücləndirərək Polşa və Baltik ölkələrində əlavə qüvvələr yerləşdirirdi. Yeni memorandum isə Vaşinqtonun regiondakı hərbi strategiyasında müəyyən dəyişikliklərin baş verdiyi barədə ehtimalları gücləndirib.
Hələlik ABŞ Müdafiə Nazirliyi qərarın səbəbləri ilə bağlı rəsmi geniş açıqlama verməyib. Analitiklər hesab edirlər ki, bu addım həm ABŞ ordusunun qlobal resurs bölgüsü, həm də digər regionlarda artan təhlükəsizlik prioritetləri ilə əlaqəli ola bilər.
Poliqon.info
