Nevroloq Natalya Suvorinova hesab edir ki, fəqərəarası yırtıqlar yaş artdıqca insanlarda tez-tez yaranır və onurğada baş verən dəyişikliklərin təbii nəticəsi hesab olunur. Lakin bu diaqnozun olması hər zaman ağrı ilə müşayiət edilmir.
BAKU.WS xəbər verir ki, rusiyalı həkim "pravda.ru"ya bildirib ki, zaman keçdikcə onurğaya düşən daimi yük səbəbindən qığırdaq toxuması tədricən nazikləşir. Nəticədə onurğa sütununun müxtəlif hissələrində fəqərəarası disklərin kiçik çıxıntıları yarana bilər.
Mütəxəssis vurğulayıb ki, bu cür dəyişikliklər insanların böyük əksəriyyətində müşahidə olunur və çox vaxt insanın gündəlik vəziyyətinə və sağlamlığına təsir etmir.
Suvorinovanın sözlərinə görə, əgər ağrı və ya digər şikayətlər yoxdursa, adətən xüsusi müayinə və müalicəyə ehtiyac olmur. O bildirib ki, simptomsuz yırtıqların xüsusi olaraq axtarılması fayda vermir və yalnız insanlarda əlavə narahatlıq yarada bilər.
Ekspert əlavə edib ki, cərrahi müdaxilə yalnız ağır hallarda - məsələn, yırtıq onurğa beynini sıxmağa başladıqda lazım olur:
"Bu vəziyyət güclü ağrı, əl və ayaqlarda zəiflik, eləcə də digər ciddi nevroloji əlamətlərlə özünü göstərə bilər.
Profilaktika məqsədilə həkim fiziki aktivliyin qorunmasını və əzələ korsetin möhkəmləndirilməsini tövsiyə edib. Onun sözlərinə görə, güclü əzələlər onurğaya düşən yükü azaldır və fəqərəarası yırtıqlarla bağlı ağırlaşmalar riskini minimuma endirir".
