Özəl sektorla işləyən bank üçün layihələrin əlçatanlığı və maliyyələşdirilə bilmə imkanı əsas problem olaraq qalır.
"Report" xəbər verir ki, bu barədə Avropa Yenidənqurma və İnkişaf Bankının (EBRD) Dayanıqlı İnfrastruktur Qrupunun idarəedici direktoru Harri Boyd-Karpenter Bakıda Ümumdünya Şəhərsalma Forumunun 13-cü sessiyası (WUF13) çərçivəsində keçirilən "Qlobal Mənzil Maliyyələşdirməsindən Yerli Əlverişli Mənzil Fəaliyyətinə: Qlobal İnkişafdan və Submilli Maliyyədən İstifadə" adlı panel müzakirəsində bildirib.
"Bizim maliyyələşdirilə bilən layihələrə ehtiyacımız var, lakin tez-tez mənzil ilə bağlı ödənişləri çətinləşir və ya insanlar vəsaitləri son dərəcə güzəştli şərtlərlə əldə etməyə çalışırlar, bu da EBRD-nin iş modeli ilə tam uzlaşmır. Digər bir çətinlik yerli spesifikadan və hər bir fərdi halda məhdudiyyətlərin unikal olmasından ibarətdir. Bizi son dərəcə təəccübləndirən fakt odur ki, bir şəhərdə effektiv işləyən həll yolu qonşu şəhərdə işə yaramır. Bir ölkədə nəticə verən yanaşma digər ölkədə qətiyyən işləmir. Bununla əlaqədar olaraq, yerli səviyyədə detallara xüsusi diqqət yetirmək lazımdır, bu isə qrant və texniki əməkdaşlıq sahəsində mühüm resurslar tələb edir", - H. Boyd-Karpenter deyib.
