Amerikanın mikroçip istehsalçısı AMD Tayvanın yarımkeçirici və süni intellekt ekosisteminə 10 milyard dollardan çox investisiya yatırmağı planlaşdırır. Bu barədə şirkətin saytında yayımlanan press-relizdə deyilir.
Məlumata görə, süni intellekt infrastrukturu üçün artan tələbatı qarşılamaq məqsədilə AMD “strateji tərəfdaşlıqları genişləndirmək və yeni nəsil süni intellekt infrastrukturu üçün qabaqcıl korpuslama həllərinin (advanced packaging) istehsalını miqyaslandırmaq məqsədilə Tayvan ekosisteminə 10 milyard dollardan çox vəsait yatıracaq”.
“AMD Tayvandakı və dünya üzrə strateji tərəfdaşlarla əməkdaşlıq edərək daha yüksək məhsuldarlıq, daha böyük səmərəlilik və süni intellekt sistemlərinin daha sürətli tətbiqini təmin edən qabaqcıl silikon çip, korpuslama və istehsal texnologiyalarını inkişaf etdirir”, — press-relizdə qeyd olunub.
“Sİ-nin tətbiqi sürətləndikcə qlobal müştərilərimiz hesablama resurslarına artan tələbatı qarşılamaq üçün Sİ infrastrukturunu sürətlə genişləndirirlər”, — deyə AMD-nin baş direktoru Lisa Su bildirib.
CNBC qeyd edir ki, Tayvan dünyanın ən böyük çip istehsalçısı olan TSMC sayəsində yarımkeçirici sənayesinin mərkəzində yerləşir. Şirkət “Nvidia”dan “Apple”a qədər dünyanın ən bahalı şirkətləri üçün məhsul istehsal edir.
AMD Tayvanın “ASE Technology” və SPIL şirkətləri ilə çiplərin məhsuldarlığını artırmağa imkan verən birləşdirmə texnologiyaları sahəsində əməkdaşlıq etdiyini açıqlayıb. Şirkətin bildirdiyinə görə, bu innovasiyalar 2026-cı ilin ikinci yarısında Helios adlı server əsaslı SI sisteminin istifadəyə verilməsini dəstəkləmək üçün nəzərdə tutulub. CNBC-nin məlumatına görə, Helios layihəsinin yaradılmasına kömək edən tərəfdaşlar arasında “Sanmina”, “Wiwynn”, “Wistron” və “Inventec” də var.
CNBC qeyd edir ki, AMD süni intellekt infrastrukturu üzrə iri xərclərdən faydalanan şirkətlərdən birinə çevrilib: ilin əvvəlindən onun səhmləri iki dəfə bahalaşıb. Şirkət 2027 maliyyə ilinin birinci rübündə (26 apreldə başa çatıb) gəlirini 85% artıraraq 81,6 milyard dollara çatdıran “Nvidia” ilə rəqabət aparır.
