Rusiyanın Ukraynaya qarşı genişmiqyaslı işğalı Kremlin ölkəyə supergüc statusunu qaytarmaq planının bir hissəsi idi. Lakin müharibənin beşinci ilində bu plan Moskva üçün fəlakətli problemə çevrilib...
Poliqon xəbər verir ki, bu barədə Almaniyanın Bild nəşri yazır.
Nəşr mövcud vəziyyəti təhlil edərək Vladimir Putin üçün hazırda həlli mümkün görünməyən üç əsas problemi qeyd edib.
Birinci problem - böyük canlı qüvvə itkiləridir.
Qərb qiymətləndirmələrinə görə, Rusiya hər ay təxminən 35 min hərbçisini öldürülən və yaralananlar kimi itirir.
Rusiya müxalifət jurnalistlərinin hesablamalarına əsasən, indiyədək həlak olan rus hərbçilərinin sayı 352 min nəfərə çatıb. Onlardan təxminən 217 min 800 nəfərin şəxsiyyəti müəyyən edilib.
Kreml hələlik itkiləri yeni müqaviləli hərbçilərlə kompensasiya edə bilsə də, ilin əvvəlindən etibarən Rusiya ordusunun say artımı dayanıb.
İkinci problem - işğal olunmuş ərazilərin itirilməsidir.
Bild qeyd edir ki, uzun müddətdən sonra ilk dəfə Rusiya tutduğundan daha çox ərazi itirməyə başlayıb.
Hələlik söhbət böyük göstəricilərdən getməsə də, bu tendensiya Rusiyanın yeni irəliləyişlərini mənasızlaşdırır.
Hesablamalara görə, ilin əvvəlindən bəri Rusiya cəmi 220 kvadratkilometr ərazi ələ keçirə bilib. Bu isə Ukrayna ərazisinin cəmi 0,04 faizinə bərabərdir.
Bu rəqəm Ukrayna ordusunun əks-hücum nəticələrinə yaxın hesab olunur. Son aylarda Ukrayna Müdafiə Qüvvələri 189 kvadratkilometr ərazini geri qaytarıb.
Üçüncü problem isə müharibənin Rusiyanın özünə qayıtmasıdır.
Qısa xarici hərbi əməliyyat kimi planlaşdırılan müharibə artıq beşinci ilində getdikcə daha çox Rusiya ərazisinə yayılır.
Ukrayna pilotsuz aparatları artıq sistemli şəkildə Rusiyanın dərin arxa bölgələrində yerləşən neft emalı zavodlarına, hərbi obyektlərə və infrastruktura zərbələr endirir.
Hətta Moskva aqlomerasiyası — Putinin imperiyasının mərkəzi də təhlükə altına düşüb. İndiyədək müharibənin özlərinə təsir etmədiyini düşünən sakinlər üçün yaşayış binaları üzərində baş verən partlayışlar ciddi şok yaradıb.
Poliqon.info
