Cebheinfo portalından alınan məlumata görə, ain.az xəbər verir.
İranın ali lideri Müctəba Xameneyi ölkəsinə məxsus uranın xaricə çıxarılmasına qadağa qoyub.
“Reuters” bu barədə İranın iki rəsmi mənbəsinə istinadən məlumat yayıb.
“Ali liderin göstərişi və hakimiyyət daxilindəki razılaşma zənginləşdirilmiş uran ehtiyatlarının ölkədən çıxarılmamasından ibarətdir”, - mənbələrdən biri belə deyib.
“Belə bir qadağa Tehranın ABŞ-nin sülh danışıqlarındakı əsas tələblərindən biri ilə bağlı mövqeyini sərtləşdirir. Xameneyinin əmri Trampı daha da əsəbiləşdirə, ABŞ və İsrailin İrana qarşı müharibəsinə son qoymaq üçün danışıqları çətinləşdirə bilər.
Bu arada, İranın Ali Lideri hələ də ictimaiyyət qarşısına çıxmayıb və seçilməsindən iki aydan çox vaxt keçməsinə baxmayaraq, onun iştirak etməməsi Müctəba Xameneyinin səhhəti ilə bağlı şübhələri daha da artırır. Bu səbəbdən İran rəsmiləri Müctəba Xameneyinin vəziyyəti ilə bağlı yeni xəbərlər açıqlamağa başladılar və onun təkcə sağlam deyil, həm də vəziyyətə tam nəzarət etdiyi görüntüsünü yaratmağa çalışdılar”,-deyə “Reuters” yazır.
Qeyd edilən məlumat İranın nüvə proqramına dair danışıqlarda əldə oluna biləcək yeganə razılaşma imkanını aradan qaldırır. Çünki Tramp administrasiyası İranın 60 faiz zənginləşdirilmiş 460 kiloqram uran ehtiyatını ya ABŞ-yə verməyi, ya da üçüncü ölkəyə köçürməyi təklif edirdi.
Rəsmi Tehran zənginləşdirilmiş uranı ABŞ-yə təhvil verməkdən imtina etdiyinə görə İran ərazisindən çıxartmaq üçün başqa ölkəyə daşımaq variantı müzakirə olunurdu. Hələlik, uranın köçürülə biləcəyi ölkə kimi əsasən Rusiyanın adı çəkilsə də, ABŞ bu məsələyə konkret cavab verməyib. Lakin zənginləşdirilmiş uranın İrandan çıxarılması təklifi danışıqların davam etdirilməsi və eskalasiyanın qarşısının alınması baxımından kompromis variant kimi nəzərdən keçirilirdi.
İndi isə ali lider Müctəba Xameneyinin zənginləşdirilmiş uranın çıxarılmasına qadağa qoyması, yaxud onun adından belə bir məlumatın yayılması rəsmi Tehranın bu variantdan de-yure imtina etməsi deməkdir. Yəni İran rejimi heç bir halda nüvə məsələsini danışıqlar predmetinə çevirmək və ondan imtina etmək istəmədiyini nümayiş etdirir. Müctəba Xameneyinin bu göstərişi ABŞ Prezidenti Donald Trampın tərəflərin anlaşmaya yaxın olduqları barədə son bəyanatlarının üzərindən xətt çəkir. Bu isə müharibənin yenidən başlanmasına təkan verə bilər. İran tərəfinin qeyd edilən addımı mövcud şəraitdə daha çox İsrail hökumətinin maraqlarına cavab verir.
Knessetin buraxılması nəticəsində oktyabrın 27-dən tez parlament seçkilərinə getmək məcburiyyətində qalan Benyamin Netanyahunun səsvermə qutusundan qalib çıxmaq şansları azalıb. İsraildə yaranmış hökumət böhranı müxalif Naftali Bennet və Yair Lapidin koalisiyasından ibarət Birlik Partiyasının reytinqini artırıb. Demokratlar Partiyasının da növbəti parlamentdə xeyli mandat qazanmaq imkanı var. Bu səbəbdən Netanyahu seçkilərdə qalib gəlmək üçün İranın nüvə proqramından istifadə edib müharibəyə başlaya bilər.
Müşfiq Abdulla
"Cebheinfo.az"
Problemlərinizi bizə yazın, şahidi olduğunuz hadisələri çəkib göndərin
Sonrakı hadisələr barədə daha çox məlumat almaq üçün ain.az saytını izləyin.
