CH-4 dronları Rusiya bazası yaxınlığındakı hərbi aerdromda yerləşdirilib...
Poliqon xəbər verir ki, Ermənistan Çin istehsalı olan CH-4 tipli strateji kəşfiyyat-zərbə pilotsuz uçuş aparatlarını əldə edib və onları Gümrüdə yerləşən hərbi aerodromda, Rusiya 102-ci hərbi bazasına yaxın ərazidə yerləşdirib. Bu nəticəyə OSINT (açıq mənbə kəşfiyyatı) analitikləri sosial şəbəkələrdə yayılan və 28 mayda İrəvanda keçiriləcək hərbi parad hazırlıqlarını əks etdirən görüntülərin təhlili əsasında gəliblər.
Hərbi-analitik Defence Security Asia nəşrinin məlumatına görə, Çin istehsalı olan CH-4 pilotsuz uçuş aparatlarının Ermənistan ərazisində, Rusiya hərbi bazasına bu qədər yaxın məsafədə görünməsi Cənubi Qafqazda qüvvələr balansını dəyişən yeni amil kimi qiymətləndirilir. Nəşr qeyd edir ki, əvvəllər açıqlanmayan bu dronların mövcudluğunun ortaya çıxması regionda təhlükəsizlik arxitekturasının sürətlə dəyişdiyinə dair strateji siqnal kimi qəbul olunur.
Analitiklərin fikrincə, iki ədəd CH-4 zərbə dronunun Gümrü aviabazasında təsdiqlənmiş şəkildə görünməsi bu silahların əvvəlcədən əldə edildiyi barədə məlumatların gizlədilməsi cəhdlərinə son qoyub. Bu isə Ermənistanın son aylarda hərbi potensialını modernləşdirməyə yönəlmiş addımlarının daha açıq şəkildə üzə çıxmasına səbəb olub.
Defence Security Asia həmçinin bildirir ki, Ermənistanın məhdud sayda CH-4 tipli çoxməqsədli dronlar alması 2020-ci il müharibəsindən sonra təhlükəsizlik konsepsiyasına yenidən baxıldığını göstərir. Həmin müharibədə Azərbaycan ordusu müxtəlif tipli pilotsuz uçuş aparatlarından istifadə edərək Ermənistanın hərbi texnikasına, canlı qüvvəsinə və hava hücumundan müdafiə sistemlərinə ciddi zərbələr endirmişdi.
Analitiklər hesab edirlər ki, Ermənistanın Çindən bu tip silahlar alması regionda Rusiyanın təsir imkanlarının zəifləməsi ilə bağlı daha bir göstərici kimi də qiymətləndirilə bilər. Bununla belə, ekspertlər vurğulayırlar ki, CH-4 kimi məhdud sayda dronlar Ermənistan üçün hərbi balansı tam dəyişmək gücündə deyil.
Qeyd olunur ki, Azərbaycan son illərdə öz hərbi potensialına ciddi investisiyalar yatırır, yüksək dəqiqlikli raket sistemlərindən tutmuş müasir pilotsuz uçuş aparatlarına qədər geniş silah arsenalı əldə edir və bu da regional güc balansını müəyyən edən əsas amillərdən biri olaraq qalır.
Poliqon.info
