Milli.az saytından alınan məlumatlara görə, ain.az xəbər verir.
Kayseri (Türkiyə) mətbəxinin ən xüsusi təamlarından biri olan yağ mantısı qızğın yağda xırt-xırt qızaran xəmiri və sarımsaqlı qatıq sosu ilə klassik mantıya fərqli və doyurucu bir yanaşma gətirir. Suda bişən adi mantıdan fərqli olaraq qızardılaraq hazırlanan bu xüsusi ləzzət çölü xırtıldayan, içi isə yumşaq quruluşu ilə süfrələrinizə tam fərqli bir dad qatacaq.
Milli.Az lazım olan məhsulları təqdim edir:
Xəmir üçün:
3 su stəkanı un
1 paket instant maya (quru maya)
1 ədəd yumurta
2 xörək qaşığı qatıq
Yarım su stəkanı ilıq süd
1 çay qaşığı duz
İçlik üçün:
200 qram qiymə (mal və ya qoyun əti)
1 ədəd baş soğan
1 çay qaşığı qara istiot
1 çay qaşığı zirə
1 çay qaşığı pul bibər
1 çay qaşığı duz
Sosu üçün:
1 kasa qatıq
2 diş sarımsaq
1 xörək qaşığı kərə yağı
2 xörək qaşığı pomidor püresi (və ya tomat pastası)
Qızartmaq üçün:
Bol duru yağ
Hazırlanma qaydası
Baş soğanı rəndənin xırda gözündən keçirin (artıq suyunu sıxın). Geniş bir qabda qiyməni, rəndələnmiş soğanı və ədviyyatları (qara istiot, zirə, pul bibər, duz) yaxşıca yoğurun. Dadların bir-birinə keçməsi üçün içliyi mantını hazırlayana qədər soyuducuda dincəlməyə qoyun.
Unu dərin bir qaba ələyin. Üzərinə instant mayanı, yumurtanı, qatığı, ilıq südü və duzu əlavə edərək ələ yapışmayan, yumşaq bir xəmir yoğurun. Xəmirin üzərini təmiz bir dəsmalla örtərək isti mühitdə təxminən 35-40 dəqiqə mayalanmağa (gəlməyə) buraxın.
Mayalanan xəmiri masanın üzərinə alıb kündələyin və çox nazik olmayacaq şəkildə (adi mantı xəmirindən bir azca qalın) yayın. Yaydığınız xəmiri bıçaqla kiçik kvadrat formalarda kəsin.
Hər kvadratın ortasına hazırladığınız qiyməli içlikdən qoyun və xəmirin künclərini ortada birləşdirərək boğça şəklində sıx bağlayın.
Dərin bir tavada duru yağı yaxşıca qızdırın. Mantıları qızğın yağa ataraq hər tərəfi qızılı rəng alana qədər fırladaraq qızardın. Yağdan çıxardığınız mantıları artıq yağını çəkməsi üçün kağız salfetin üzərinə düzün.
Bir qabda qatığı əzilmiş sarımsaq və bir az duzla qarışdırın. Kiçik bir tavada kərə yağını əridib üzərinə pomidor püresini əlavə edin və bir-iki dəqiqə qovurun.
İsti yağ mantılarını servis boşqabına qoyun. Üzərinə əvvəlcə sarımsaqlı qatığı, daha sonra isə isti pomidorlu kərə yağı sosunu gəzdirərək dərhal servis edin.
Nuş olsun!Lalə Qüdrətova
Milli.Az
Daha ətraflı məlumat və yeniliklər üçün ain.az saytını izləyin.
