ain.az, Bizimyol portalına istinadən məlumat verir.
Avropanın bir sıra ölkələrində may ayı üçün rekord temperatur qeydə alınıb. Böyük Britaniya, İrlandiya və Fransanı əhatə edən kəskin istilər dalğasının səbəbi kimi “istilik qübbəsi” (ingiliscə heat dome — yüksək təzyiq zonası) adlandırılan atmosfer hadisəsi göstərilir.
Bizimyol.info xəbər verir ki, Britaniya Meteorologiya Xidmətinin məlumatına görə, bölgə üzərində formalaşan sabit yüksək təzyiq sistemi isti havanı Qərbi Avropa üzərində “kilidləyərək” temperaturun kəskin artmasına səbəb olub. Bu tip atmosfer hadisəsi adətən yayın ortalarında müşahidə edilsə də, bu il qeyri-adi şəkildə erkən meydana gəlib.
Mütəxəssislər istilərin Şimali Afrikadan gələn isti hava kütlələrinin bölgədə ilişib qalması ilə daha da gücləndiyini bildirirlər. Onların fikrincə, Avropa qlobal istiləşmə fonunda digər regionlara nisbətən daha sürətlə isinən ərazilərdən biridir.
Alimlər əsas səbəblər sırasında insan fəaliyyəti nəticəsində yaranan iqlim dəyişikliyini, istixana qazlarının artmasını, atmosfer axınlarının dəyişməsini, Arktikanın sürətlə isinməsini və əvvəllər Günəş şüalarını qismən əks etdirən aerozolların azalmasını göstərirlər.
Araşdırmalara görə, sənaye inqilabından bəri Yer kürəsinin orta temperaturu təxminən 1,4°C artıb. Avropada isə bu göstərici 2,4°C-yə çatır və bəzi bölgələrdə hər on ildə 0,5–1°C sürətində artım müşahidə olunur.
Mütəxəssislər xəbərdarlıq edirlər ki, hazırkı istilər dalğası tək bir hadisə olmaya bilər və Avropada ekstremal hava şəraitinin daha da tez-tez və güclü şəkildə baş verməsinin uzunmüddətli tendensiyasına işarə edə bilər.
Bizimyol.info
Sonrakı hadisələr barədə daha çox məlumat almaq üçün ain.az saytını izləyin.
