Həkimlər xərçəng əleyhinə üçlü təsirə malik yeni iynə preparatının sınaq nümayişlərini yüksək qiymətləndiriblər.
Tədqiqatlar göstərir ki, bu dərman pasiyentlərdəki bədxassəli şişləri tamamilə məhv etmək qabiliyyətinə malikdir.
Bizim.Media xəbər verir ki, bu barədə "The Guardian" nəşri məlumat yayıb. 11 ölkəni əhatə edən beynəlxalq kliniki sınaqlar çərçivəsində bu iynə xərçəng hüceyrələri bədənə yayılmış (metastaz vermiş), xəstəliyi yenidən təkrarlanmış və digər müalicə üsullarına cavab verməyən ağır pasiyentlərə təklif olunub.
Şişləri "əridən" möcüzəvi təsir "Amivantamab" adlı bu inyeksiya pasiyentlərin üçdə birindən çoxunda şişlərin kiçilməsinə səbəb olub, üstəlik ilk müsbət dəyişikliklər cəmi bir neçə həftə ərzində qeydə alınıb.
Həkimlər müəyyən ediblər ki, preparat 15 xəstədə xərçəng şişini tamamilə "əridərək" yox edib. Tədqiqatın rəsmi nəticələri şənbə günü Çikaqoda keçirilən xərçəng xəstəlikləri üzrə dünyanın ən böyük konfransında — Amerika Kliniki Onkologiya Cəmiyyətinin (ASCO) illik toplantısında təqdim olunacaq.
Sınaqlarda dünyada ən çox yayılmış 6-cı xərçəng növü olan baş və boyun nahiyəsinin xərçəngindən əziyyət çəkən 102 pasiyent iştirak edib. Onlardan 43-də şişlər ya tamamilə yox olub, ya da əhəmiyyətli dərəcədə kiçilib. Bu göstəriciyə şişləri kəskin dərəcədə azalan 28 nəfər və xəstəlikdən tamamilə azad olan 15 pasiyent daxildir.
"Ağıllı iynə" xərçənglə necə mübarizə aparır?
Tədqiqatçılar qeyd edirlər ki, preparat ağciyər xərçəngi olan xəstələrdə də bənzər effektiv nəticələr göstərib. "Johnson & Johnson" şirkəti tərəfindən hazırlanan "Amivantamab" hazırda təxminən 60 fərqli kliniki sınaqda yoxlanılır.
Bu sınaqlar əsasən ağciyər xərçənginin, həmçinin bağırsaq, beyin və mədə xərçənginin müalicəsi üçün nəzərdə tutulub. Bu "ağıllı" inyeksiya xərçəng hüceyrələrinə qarşı eyni anda üç istiqamətdə hücum edir: Şişlərin böyüməsinə kömək edən EGFR (epidermal böyümə faktoru reseptoru) zülalını bloklayır.
Xərçəng hüceyrələrinin müalicədən qaçmaq üçün istifadə etdiyi MET siqnal yolunu bağlayır. Şişə birbaşa hücum etmək üçün orqanizmin öz immunitet sistemini aktivləşdirir.
Pasiyentlər üçün rahat və təhlükəsiz üsul bir çox digər ağır xərçəng müalicələrindən fərqli olaraq, "Amivantamab" xəstəyə sistem (venadaxili damcı) vasitəsilə deyil, dəri altına kiçik bir iynə vurulmaqla yeridilir. Bu, müalicə prosesini xeyli sürətləndirir, pasiyentlər üçün rahat edir və ambulator klinikalarda tətbiqini sadələşdirir.
Hər üç həftədən bir həyata keçirilən bu müalicənin yan təsirlərinin əksəriyyəti yüngül və ya mülayim xarakter daşıyıb.
Bizim.Media
