ABŞ-nin strateji neft ehtiyatlarının (SPR) həcmi 2024-cü ilin aprel ayından bəri ən aşağı səviyyəyə enib. Ötən həftənin sonunda ABŞ Energetika Nazirliyi bildirib ki, hazırda SPR-də neft və neft məhsullarının ehtiyatı 1,584 milyard barel təşkil edir və azalma davam edir. ABŞ-nin strateji anbarlarındakı neft ehtiyatları sonuncu dəfə 2003-cü ilin martında 1,5 milyard bareldən aşağı düşmüşdü.
CNN-in hesablamalarına görə, İranla müharibənin başlanmasından sonra SPR-dəki neft ehtiyatlarının həcmi təxminən 12% azalıb. S&P Global Energy agentliyi qeyd edir ki, Hörmüz boğazında hərəkətin pozulması səbəbindən dünya neft bazarı 1,2 milyard barel neftdən məhrum olub. Yalnız ötən həftə ərzində çatışmazlığı kompensasiya etmək üçün SPR-dən bazara 9,1 milyon barel neft buraxılıb.
Ekspertlər bildirirlər ki, ABŞ və İran arasında sülh sazişi əldə olunsa belə, bazarda vəziyyətin normallaşması vaxt aparacaq.
RBC Capital Markets şirkətinin analitiki Helima Kroft CNN-ə açıqlamasında deyib: “Hətta sabah razılaşma əldə olunsa belə, boğazda yaranmış sıxlığın aradan qaldırılması təxminən altı həftə çəkə bilər. Bu isə yay mövsümündə tələbatın pik həddə çatdığı dövrdə ehtiyatlar üzərində təzyiqi daha da artıracaq”.
