CBS: Hücum nəticəsində dörd ABŞ hərbçisi və üç mülki əməkdaş yüngül xəsarət alıb, tərəflər qarşılıqlı ittihamlarını davam etdirir...
Ötən həftə İranın Küveytdə yerləşən aviabazaya raket hücumu zamanı dörd ABŞ hərbçisi və üç mülki əməkdaş yüngül xəsarətlər alıb.
Poliqon xəbər verir ki, bu barədə CBS News telekanalı məlumatlı mənbəyə istinadən xəbər yayıb.
Mənbənin sözlərinə görə, yaralanan şəxslərə tibbi yardım göstərildikdən sonra onlar yenidən xidmət vəzifələrinin icrasına qayıdıblar.
Bundan əvvəl ABŞ Silahlı Qüvvələrinin Yaxın Şərq üzrə Mərkəzi Komandanlığı (CENTCOM) bildirmişdi ki, ötən cümə axşamı İran Küveyt ərazisində yerləşən və Pentaqon tərəfindən istifadə olunan Əli əl-Salem aviabazasına doğru ballistik raket buraxıb. Komandanlığın məlumatına görə, raket Küveytin raketdən müdafiə sistemləri tərəfindən havada zərərsizləşdirilib.
Öz növbəsində, İslam İnqilabı Keşikçiləri Korpusu (SEPAH) ABŞ hərbi bazasına zərbənin İranın Bəndər-Abbas bölgəsində baş vermiş hadisələrə cavab olaraq həyata keçirildiyini açıqlayıb.
CENTCOM-un məlumatına əsasən, ABŞ hərbçiləri cümə axşamına keçən gecə dörd İran kamikadze pilotsuz uçuş aparatını məhv edib, həmçinin beşinci PUA-nın buraxılışına hazırlıq görüldüyü iddia edilən Bəndər-Abbasdakı yerüstü idarəetmə stansiyasına zərbə endirib. Komandanlıq bu addımların yalnız müdafiə xarakteri daşıdığını, pilotsuz aparatların Oman körfəzində yerləşən ABŞ gəmiləri üçün təhlükə yaratdığını bildirib.
Son günlər Vaşinqton və Tehran arasında qarşılıqlı hərbi fəaliyyətlərin intensivləşməsi regionda təhlükəsizlik riskləri və mümkün eskalasiya ehtimalları ilə bağlı narahatlıqları artırıb.
Poliqon.info
