Çərşənbə axşamı neft qiymətləri, ABŞ və İran arasındakı danışıqlar ətrafında qeyri-müəyyənliyin davam etməsi fonunda, əvvəlki sessiyadakı kəskin artımdan sonra ucuzlaşıb.
Xalqcebhesi.az xəbər verir ki, bu barədə "Reuters" agentliyi məlumat yayır.
Saat 08:34-ə olan məlumata görə, "Brent" markalı neftin fyuçersləri 0,79% ucuzlaşaraq bir barreli 94,23 dollara düşüb. "WTI" nefti isə 0,92% azalaraq bir barreli 91,31 dollar təşkil edib.
Ötən gün hər iki etalon marka 5%-dən çox bahalaşmışdı, lakin may ayının əvvəllərində mümkün sülh sazişi gözləntiləri fonunda 16%-dən çox dəyər itirmişdi.
ABŞ Prezidenti Donald Tramp bazar ertəsi bildirib ki, İranla danışıqlar davam edir, lakin İranın "Tasnim" agentliyi Vaşinqtonla dolayı təmasların dayandırıldığını xəbər verib.
"Phillip Nova" şirkətinin baş analitiki Priyanka Saçdeva qeyd edib: "Bazarlar razılaşma perspektivləri fonunda qeyri-müəyyənliyin azalacağına ümid edirdilər, lakin səhər saatlarına olan məlumata görə, vəziyyət demək olar ki, dəyişməz qalıb".
Tramp "CNBC" telekanalının efirində danışıqların dayandırılmasına etiraz etmədiyini bildirsə də, daha sonra sosial şəbəkələrdə dialoqun davam etdiyini dəqiqləşdirib və "gələn həftə ərzində" atəşkəsin uzadılması, həmçinin Hörmüz boğazının fəaliyyətinin bərpası haqqında sazişin əldə olunacağını gözlədiyini ifadə edib.
Analitiklər qeyd edirlər ki, neft bazarı üçün əsas amil kimi ABŞ və İran danışıqlarındakı real irəliləyişlər, həmçinin Hörmüz boğazındakı vəziyyət və gəmilərin hərəkəti qalmaqdadır.
Məryəm Quliyeva
