Bir qrup Aİ ölkəsi - Hollandiya, Avstriya, Danimarka, Almaniya və Yunanıstan sığınacaq müraciətləri rədd edilmiş qaçqınlar üçün Qazaxıstan və Özbəkistanda saxlama mərkəzləri yaratmağı nəzərdən keçirir.
"Politico"nun anonim qalmaq istəyən Aİ diplomatlarına istinadən verdiyi məlumata görə, təşəbbüskarlar oxşar təkliflə səkkiz-on əlavə ölkəyə müraciət etməyə hazırdırlar. Mərkəzlərin açılması təklifinə razılaşanlara bunun əvəzində inkişaf yardımı və ya viza liberallaşdırılması vəd ediləcək. "Geri qaytarma mərkəzləri"nin yaradılması təşəbbüsü Avropa liderlərinin qanunsuz miqrasiya ilə mübarizə aparmaq üçün tədbirlər gördüklərini nümayiş etdirməyə çalışdıqları və ifrat sağçı partiyalara artan dəstək fonunda baş verir. Hollandiya hökuməti artıq parlamentə qaçqın qəbul mərkəzlərinin yaradılması üçün qanuni təsdiq verib və ilin sonuna qədər konkret addımların atılması gözlənilir.
Lakin Qazaxıstan Xarici İşlər Nazirliyi Aİ-nin viza sadələşdirilməsi müqabilində ölkədə qaçqın mərkəzləri yaratmaq planları ilə bağlı məlumatları təkzib edib. Xarici İşlər Nazirliyinin sözçüsü Yerlan Jetıbayev bildirib ki, "Bildiyim qədəri ilə belə bir danışıqlar aparılmır. Biz Avropa tərəfi ilə vətəndaşlarımız üçün viza tələblərinin yüngülləşdirilməsi, eləcə də readmissiya müqaviləsi barədə danışıqlar aparırıq. Lakin bu, sadəcə o deməkdir ki, vətəndaşlarımızdan biri qanunsuz olaraq ölkəni tərk edərsə, biz onu yenidən qəbul etməyi öhdəmizə götürürük".
SAMİRƏ
