Azərbaycanın çoxəsrlik tarixinə qızıl hərflərlə yazılan Zəfər salnaməsi Vətəni canından əziz bilən qəhrəman oğullarımızın qanı və canı bahasına başa gəlib. Torpaqlarımızın azadlığı naminə canını fəda edərək ölümsüzlük qazanan belə igidlərdən biri də Vətən müharibəsi şəhidi Basid İdris oğlu Rüstəmovdur. Qəhrəmanın doğum günü münasibətilə Kəngərli rayonunun Xok kəndində onun xatirəsinə həsr olunmuş anım tədbiri keçirilib.
Şəhidin müqəddəs məzarı önündə təşkil olunan mərasimdə öncə yerli dini icmanın sədri tərəfindən Qurani-Kərimdən ayələr oxunub, canlarını ölkəmizin bütövlüyü naminə qurban vermiş bütün şəhidlərimizin əziz ruhuna dualar edilib.
Tədbirdə iştirak edən Kəngərli Rayon İcra Hakimiyyətinin başçısı Kamal Ələkbərov çıxış edərək 44 günlük Vətən müharibəsinin xalqımızın sarsılmaz monolit birliyini və dəmir iradəsini dünyaya nümayiş etdirdiyini vurğulayıb. İcra başçısı qeyd edib ki, Müzəffər Ali Baş Komandan, Prezident cənab İlham Əliyevin rəhbərliyi altında rəşadətli Azərbaycan Ordusunun qazandığı tarixi Qələbə uzun illərdir həsrətlə gözlənilən ədaləti bərpa etdi. Bu möhtəşəm Zəfər dövlətimizin qüdrətinin, xalq-ordu həmrəyliyinin və hərbi gücümüzün əyani sübutu kimi müasir hərb tarixinə düşüb.
Şəhid Basid Rüstəmovun keçdiyi qısa, lakin şərəfli ömür yoluna nəzər salan Kamal Ələkbərov onun xarakterindəki vətənpərvərlik, mərdlik və fədakarlıq xüsusiyyətlərindən bəhs edib. Bildirilib ki, Basid kimi gənclərin nümayiş etdirdiyi döyüş rəşadəti bu gün yetişməkdə olan yeni nəsil üçün əsl vətəndaşlıq və rəşadət məktəbidir.
Daha sonra çıxış edən şəhid atası Habil Cəfərov vurğulayıb ki, qəhrəmanlarımızın adını yaşatmaq və onların müqəddəs əmanətinə sahib çıxmaq cəmiyyətimizin ən ali mənəvi vəzifəsidir. O, övladlarımızın göstərdiyi şücaətin tariximizin ən parlaq səhifəsi olduğunu qeyd edərək, şəhid ailələrinə dövlət səviyyəsində göstərilən xüsusi diqqət və qayğıya görə minnətdarlığını bildirib.
Anım mərasimində məktəblilərin ifasında şəhidlərimizin qəhrəmanlığını, Vətən sevgisini tərənnüm edən poetik kompozisiya nümayiş olunub, şeirlər səsləndirilib.
Tədbirin sonunda şəhidin atası İdris Rüstəmov çıxış edərək oğlunun xatirəsinin daim uca tutulmasından qürur duyduğunu dilə gətirib. O, ailəsinə göstərilən mənəvi dəstəyə və bu təsirli tədbirin ərsəyə gəlməsində əməyi olan hər kəsə dərin təşəkkürünü ifadə edib.
Ziyarətçilər qəhrəmanımızın məzarı üzərinə tər qərənfillər düzərək xatirəsini bir daha ehtiramla yad edib, birgə xatirə fotosu çəkdiriblər.
Bəxtiyar ƏLİTEV
"Naxçıvan Şəhid Ailələri" İctimai Birliyinin mətbuat katibi
