Almaniya müdafiə konserni “Rheinmetall” Rumıniya hakimiyyəti ilə 5,7 milyard avroluq müqavilə imzalayıb. Ölkəyə 298 ədəd Lynx döyüş maşını, Skyranger hava hücumundan müdafiə sistemləri, çoxsaylı döyüş sursatı və dörd hərbi kater tədarük ediləcək. Oxuməni.az xəbər verir ki, bu barədə “Rheinmetall”-ın mətbuat xidmətindən məlumat verilib.
Müdafiə konserni bu müqaviləni "tarixi" və "şirkətin son dövrlər tarixindəki ən böyük beynəlxalq sifariş" adlandırıb. “Rheinmetall”-ın məlumatına görə, müqavilə üzrə ilk tədarüklər 2028-ci ildə başlamalı və 2030-cu ilə qədər başa çatmalıdır. Bunun üçün şirkət Rumıniyada öz istehsalını açmağı və ölkənin müdafiə sənayesinə bir neçə yüz milyon avro sərmayə qoymağı planlaşdırır.
“Rheinmetall”-ın baş direktoru Armin Papperger hələ 2026-cı ilin mart ayında Rumıniya ilə gələcək müqaviləyə işarə etmişdi. Almaniyanın “Frankfurter Allgemeine Zeitung” qəzetinin yazdığına görə, sifariş portfelinin proqnozuna həsr olunmuş investor təqdimatında Ukrayna və İtaliya ilə yanaşı, əsas sifarişçi ölkələrdən biri kimi Rumıniya göstərilmişdi. “Rheinmetall” yaxın vaxtlarda bu ölkələrdən ümumilikdə təxminən 16 milyard avro dəyərində sifariş gözləyir.
Almaz Həsənli
