Boşanmış qadın başqası ilə sevgili oldu, qardaşı biləndə... - Onu yox, məni...

Cəlilabad rayonunda 2003-cü il təvəllüdlü Həsən qısqanclıq zəminində yaranan münaqişə zamanı 1998-ci il təvəllüdlü həmyerlisi Eldarı (adlar şərti verilib – red.) öldürməyə cəhd edib. Həsən ötən il sentyabrın 4-də gecə saat 1 radələrində yaşadığı evdə bacısı Səlimənin mobil telefonunda Eldarla sevgi mövzusunda yazılmış ismarıcları görüb. Qısqanclıq hislərinin təsirindən o, Eldarı öldürmək qərarına gəlib. Evdə saxladığı ov bıçağını şalvarının cibinə qoyub. Səhər saat 10.30-da yaşadığı evdən çıxıb və dostu Valehlə görüşüb.

Həsən Valehlə birlikdə Eldarı Səlimə ilə birgə işlədiyi “Real” mağazasından çağırıb. Birlikdə mağazanın yaxınlığından axan Göytəpə çayının kənarına gediblər, orada yumruq və ayaq zərbəsi, eləcə də üzərində gəzdirdiyi bıçaqla Eldara çoxsaylı zərbələr endirib. Eldar xəstəxanaya çatdırılıb, tibbi yardım göstərilməsi səbəbindən onun həyatını xilas etmək mümkün olub. İstintaq orqanı tərəfindən Həsənin barəsində Cinayət Məcəlləsinin 29,120.2.4-cü (xüsusi amansızlıqla qəsdən adam öldürməyə cəhd) maddəsi ilə ittiham elan edilib. Cinayət işi üzrə təqsirləndirilən şəxs qismində ifadə verən Həsən elan olunmuş ittiham üzrə özünü təqsirli bilib. O bildirib ki, sentyabrın 4-də saat 1 radələrində Səlimə ilə evin həyətində əyləşən zaman bacısının “Redmi” markalı mobil telefonuna ardıcıl ismarıclar gəldiyini görüb. Gecə vaxtı ismarıclar gəlməsindən əsəbiləşərək telefonu bacısından tələb edib: “Telefonu stolun üzərindən götürsəm də, kiliddə olduğu üçün aça bilmədim. Bacımdan kilidi açmağı tələb etdim, amma açmadı. Bir neçə dəfə şifrəni təsadüfən yığaraq kilidi aça bildim. Sosial şəbəkəyə daxil olub bacıma Abbasov soyadlı şəxsin sevgi mətnli ismarıclar yazdığını gördüm. Əsəbiləşib bacımın sifət nahiyəsinə bir neçə şillə vurdum. Anam və qardaşım gələrək bizi sakitləşdirməyə çalışdılar. Bacımdan Abbasov soyadlı şəxsin kimliyini soruşduqda, həmin şəxsin “Real” mağazasında birlikdə işlədikləri Eldar olduğunu, aralarında həqiqətən sevgi münasibətlərinin yarandığını dedi. Bacımın özünün və ailəmizin çətin vəziyyətində sevgi münasibətləri yaşamasını qəbullana bilmədim”. Həsənin sözlərinə görə, Eldarın qeyrətlərinə sataşdığı üçün onu öldürməklə cəzalandırmaq qərarına gəlib: “Bu hadisəyə qədər Eldarı tanımamışam, qohumluq əlaqəmiz, düşmənçiliyimiz və ya ədavətimiz olmayıb. Əsəbi olduğum üçün yata bilmədiyimə görə dostum Valehə zəng edərək onu çağırdım. Bir neçə dəqiqə sonra Valeh gəldi. Yaşadığım evin yerləşdiyi küçədə söhbət etməyə başladıq. Valehə Eldarın Səliməyə əxlaqsız təklif etdiyini, onunla sevgi münasibətlərində danışdığını, buna görə onunla söhbət etməli olduğumu dedim. Valeh artıq gec olduğunu, səhər açıldıqda Eldarla söhbət edə biləcəyimizi söylədi. Ayrılıb evlərimizə getdik”. Həsən qeyd edib ki, həmin gün səhər saatlarında Eldarı öldürmək məqsədi ilə evdə saxladığı qatlanan bıçağı götürüb və şalvarının sağ cibinə qoyub: “Bundan sonra Eldara “İnstagram” sosial şəbəkəsindən zəng edərək görüşmək istədiyimi dedim. O, işlədiyi mağazada olacağını söylədi. Sonra Valehə zəng edərək Eldarla görüşəcəyimi bildirdim. Valeh görüşə birlikdə getməyimizi məsləhət gördü. Küçəyə çıxdıqda Valeh yanıma gəldi, “Real” mağazasına doğru addımladıq. Eldar mağazanın arxa tərəfində əyləşərək əlindəki mobil telefonla məşğul idi. Yaxınlaşıb kim olduğunu soruşdum. O da axtardığım şəxsin özü olduğunu təsdiqlədi. Valehlə birlikdə hər ikimiz onunla salamlaşdıq, söhbət etmək, aramızda olan məsələni aydınlaşdırmaq üçün onu mağazanın yaxınlığından axan Göytəpə çayının yaxınlığına dəvət etdik. Üçümüz birlikdə çayın kənarına getdik. Söhbət etməyə başlayanda Valeh bizdən 1-2 metr aralı məsafədə dayanmışdı. Nəyə görə Eldarın bacıma nalayiq ifadələr yazdığını soruşdum. O, bacımla heç bir şəxsi münasibətlərinin olmadığını bildirdi. Mən Eldara yazdığı ismarıcları şəxsən özümün oxuduğumu, bunun onların arasında şəxsi münasibətlərin sübutu olduğunu bildirdim. Bu söhbətimiz təxminən bir dəqiqə davam etdi”. Həsən bildirib ki, Eldar bacısı ilə aralarında sevgi münasibətlərini inkar etdikdə onunla söhbətin mənasız olduğunu görüb: “Əvvəlcədən nəzərdə tutduğum planı icra etməyə başladım. Yumruqla Eldarın baş nahiyəsinə və ayaqla bədəninə zərbələr endirdim. Sonra cibimdən bıçağı çıxardım və bağlı vəziyyətdə olan bıçağın dəstəyinin arxa tərəfi ilə başına bir neçə zərbə vurdum. Bu zərbələrdən o, yerə yıxıldı. Yerdən ayağa qalxmağa çalışsa da, yenidən onun baş və bədən nahiyələrinə ayaq zərbələri vurdum ki, qalxa bilməsin. Eldar səhhəti ilə bağlı başında problem olduğunu bildirdi, zərbələr endirməyimi dayandırmağımı xahiş etdi, amma yalvarışlarına məhəl qoymadım. Bıçağın tiyəsini açıb Eldarın baş və bədən nahiyələrinə çoxsaylı zərbələri endirdim. Baş və bədəninin yuxarı hissələrinə vururdum ki, asanlıqla öldürə bilim. Eldar dedi ki, məni bağışla, qələt eləmişəm, vurma. Onun yalvarışlarına əhəmiyyət vermədim, bıçaq zərbələrinə davam etdim. Zərbələrdən yayınıb, çayın kənarına yuvarlanmaq istəyəndə onu geriyə çəkdim, yenidən vurdum. Eldarın müqavimət göstərdiyini, ölmədiyini gördüm. Yanmızda dayanan Valehə “bunun başını tut, kəsim” dedim. Valeh məni kənara itələdi. Eldarın hərəkətsiz qaldığını görəndə onun öldüyünü fikirləşdim. Buna görə Valehlə birlikdə yaşadığım evin yerləşdiyi küçəyə getdim”. İş üzrə zərərçəkmiş Eldarın sözlərinə görə, gecə saatlarında Səlimə “İnstagram” şəbəkəsində ismarıclar yazaraq onu yaşadıqları evin yerləşdiyi küçəyə dəvət edib: “Mən ona yaşadığı küçəni tanımadığım cavabını verdim. Həmin vaxt elə bilmişəm ki, yazan Səlimənin özüdür. Səhəri gün Həsən adlı şəxs zəng vurdu, dedi, səni 2 saatlıq müddətə götürəcəyik. Dedim, problem yoxdur. Həmin gün iş yerimə getdim, mağazanın arxasında oturdum. Sonradan Həsən olduğunu bildiyim şəxs mənə yaxınlaşaraq salamlaşdı, məni kənarda söhbətə dəvət etdi. Bir qədər piyada getdikdən sonra binanın tinində dayandıq. Sonradan Valeh olduğunu bildiyim şəxs bizə yaxınlaşdı, hər ikimizlə salamlaşdıqdan sonra üçümüz piyada hərəkət etməyə başladıq. Mağazanın yaxınlığından axan çayın kənarına təxminən 10-12 metr məsafə qalmış dayandıqda Həsən söhbət açaraq məndən bacısı Səliməyə niyə yazdığımı soruşdu. Söhbəti aydınlaşdırmadı, başımın arxasına bıçağın tiniylə 3-4 dəfə vurdu. Zərbələrdən özümü itirdim. Bundan sonra bıçağın ön hissəsi ilə bədənimə zərbələr vurmağa başladı. Yerə yıxıldım, ayağa qalxmağa çalışanda təpiklə bir daha vurub yıxdı. Həsən məni vurarkən yalvardım. Lakin buna məhəl qoymadı, vurmağa davam etdi. Əlimi boynuma tutmuşdum, Həsən Valehə dedi ki, başını tut, kəsim. Amma Valeh buna imkan vermədi. Həsən bıçağı sol qabırğama vurdu. Daha sonra kömək üçün ətrafdakılara yalvardım. Həsəngil getdilər. Özüm güclə durub divardan tuta-tuta mağazanın arxasına gəldim. Kənardakı adamlar kömək edib məni Cəlilabad Rayon Mərkəzi Xəstəxanasına gətirdilər. Təxminən 12 gün xəstəxanada qaldım”. İş üzrə şahid qismində ifadə verən Səlimənin sözlərinə görə, baş vermiş hadisədən təxminən səkkiz ay əvvəl ailədaxili münaqişələr səbəbindən əri Elçindən ayrılaraq azyaşlı övladları ilə birlikdə ailə üzvlərinin yanına gedib və onlarla birlikdə yaşamağa başlayıb: “Özümün və övladlarımın maddi ehtiyaclarını qarşılamaq üçün “Real” adlı mağazada satıcı işləyirəm. Həsən qardaşımdır, münasibətlərimiz həmişə mehriban olub. Mağazada gecə növbəsində işləyirəm. Sentyabrın 4-də gecə saat 1 radələrində işdən çıxaraq yaşadığım evə getdim. Saat 01.30-da yaşadığım evin həyətində oturaraq yemək yeyən zaman Həsən həyətə gəldi. Məndən telefonumu istədi, vermədim. Məcbur telefonu əlimdən alaraq evə getdi. Həsən “İnstagram” sosial şəbəkəsində birlikdə işlədiyim Eldarla bir-birimizə yazdığımız sevgi mövzusunda ismarışları gördükdə sifət nahiyəmə 2-3 şillə vurdu. Sonra əlində tutduğu cib bıçağı ilə üzərimə hücum edərək məni və Eldarı öldürəcəyini dedi. Mən cavabda Eldarı yox, məni öldürməsi barədə ona yalvardım. Mübahisə zamanı anam səs-küyü eşidərək yanımıza gəldi, Həsəni sakitləşdirib evə apardı. Ardınca mən də evə gedərək yatdım”. Səlimə qeyd edib ki, həmin gün saat 8 radələrində yuxudan oyandıqdan sonra Həsən evdən gedib: “İki-üç saat sonra əlində kiçik ölçülü bıçaqla həyətə daxil oldu. Bıçaq və əlləri qana bulaşmışdı. Ondan nə baş verdiyini soruşdum, Eldarı öldürdüyünü dedi. Mən Eldarı öldürdüyü halda məni də öldürməsini istədim. Evə doğru qaçdım, Həsən də arxamca gəldi. Bıçağı stolun üzərinə qoydu. Üzərimə hücum çəkərək sol qolunu boğaz nahiyəmə keçirməklə yuxarıya doğru qaldırdı və məni boğmağa başladı. Anam onun bel nahiyəsindən qucaqlayaraq məni buraxmasını istədi. Həsən əlini boğaz nahiyəmdən çəkəndə yerə yıxıldım. Çənə nahiyəmin alt hissəsi stula dəydikdə özümə gəldim. Həsəni daha evin həyətində görmədim”. Səlimə deyib ki, hadisədən təxminən 2 həftə əvvəl işlədiyi mağazada Eldarla tanış olub və bir-birilərindən xoşları gəlib: “Eldarla bir-birimizə “İnstagram” sosial şəbəkəsində sevgi məzmunlu ismarışlar yazmışıq. İşlədiyimiz mağazanın mətbəxində Eldarla bir dəfə gizlin formada öpüşmüşük. Aramızda olan münasibətləri başqa şəxslər bilməyib”. Bu cinayət işinə Lənkəran Ağır Cinayətlər Məhkəməsində baxılıb. Məhkəmənin hökmü ilə Həsən 14 il 6 ay müddətə azadlıqdan məhrum edilib. Onun cəzasını ciddi rejimli cəzaçəkmə müəssisəsində çəkməsi müəyyən edilib./Teleqraf.com

Saglamolun.Az

Boşanmış qadın başqası ilə sevgili oldu, qardaşı biləndə... - Onu yox, məni... – ŞOK

Войдите в свой аккаунт

Регистр

Сброс пароля