BAKI, TurkicWorld
Kölndə İkinci Dünya Müharibəsindən qalan bombalar səbəbilə şəhər boşaldılıb.
TurkicWorld xəbər verir ki, Almaniyanın Köln şəhərində İkinci Dünya Müharibəsinə aid üç partlamamış bomba aşkarlanıb.
Bombaların təhlükəsiz şəkildə zərərsizləşdirilməsi məqsədilə şəhərin Deutz rayonunda 20 mindən çox insan təxliyə edilib və genişmiqyaslı təhlükəsizlik tədbirləri həyata keçirilib.
ABŞ istehsalı olan bu bombaların tapıldığı əraziyə yaxın bütün yaşayış binaları, otellər, məktəblər, xəstəxanalar və qocalar evləri boşaldılıb. Əlavə tədbir olaraq Reyn çayı üzərindəki körpülər bağlanıb, qatarların hərəkəti dayandırılıb. Təhlükəsizlik qüvvələri tərəfindən bütün binaların bir-bir yoxlanıldığı bildirilib.
Köln İctimai Asayiş Departamentinin direktoru Ralf Mayer şəhər mərkəzində belə bir əməliyyatın böyük risk daşıdığını qeyd edərək, vətəndaşların təhlükəsizliyinin ən əsas prioritet olduğunu bildirib.
Qeyd edək ki, Almaniyada İkinci Dünya Müharibəsindən qalan partlamamış bombalara tikinti və infrastruktur işləri zamanı tez-tez rast gəlinir. Mütəxəssislər hələ də ölkə ərazisində minlərlə partlamamış sursatın yer altında olduğunu təxmin edirlər. Bu səbəbdən bənzər hallarda təhlükəsizlik səbəbilə genişmiqyaslı təxliyə tədbirləri tez-tez həyata keçirilir.
