Bakı Apellyasiya Məhkəməsində qəsdən sağlamlığa az ağır zərər vurmada təqsirləndirilən Niyaməddin Muradovun (ad, soyadı şərtidir) barəsindəki hökmdən dövlət ittihamçısı tərəfindən verilən apellyasiya protesti və apellyasiya şikayəti üzrə məhkəmə iclası yekunlaşıb.
News24.az Pravda.az-a istinadla xəbər verir ki, sonuncu keçirilən prosesdə qərar elan olunub.
Qərara əsasən, təqsirləndirilən şəxsin müdafiəçisinin apellyasiya şikayəti təmin edilməyib, zərərçəkmiş şəxsin apellyasiya şikayəti və dövlət ittihamçısının apellyasiya protesti qismən təmin olunub, Binəqədi Rayon Məhkəməsinin hökmü dəyişdirilib. Təqsirləndirilən şəxsin Cinayət Məcəlləsinin 127.1-ci maddəsi ilə təyin edilmiş aylıq qazancından dövlət nəfinə 20% məbləğində pul tutulmaqla 2 il müddətə islah işləri cəzası 2 il müddətinə azadlığın məhdudlaşdırılması (elektron qolbaq) cəzası ilə əvəz edilib.
İttihama görə, hadisə 18 oktyabr 2023-cü il tarixdə, saat 02:00 radələrində paytaxtın Binəqədi rayonu ərazisində qeydə alınıb. Belə ki, Niyaməddin Muradov onunla birgə yaşayan arvadı, zərərçəkmiş Günayə Muradova (ad, soyadı şərtidir) ilə aralarında uzun müddətdir davam edən soyuq münasibət və narazılığa görə mübahisə edib. Mübahisə zamanı o, arvadının onun icazəsi olmadan qardaşı qızının toy mərasiminə getməsini bəhanə edərək, zərərçəkmiş şəxsi baş, boyun və sifət nahiyələrinə əl zərbələri və masanın üzərində olan dolu vəziyyətdəki 2 litrlik “Coca-Cola” plastik butulkası ilə qəsdən bir neçə dəfə vurub, qadının sağlamlığına az ağır zərər yetirib. Hadisədən sonra Niyaməddin Muradov saxlanılaraq cinayət məsuliyyətinə cəlb edilib.
Binəqədi Rayon Məhkəməsinin hökmü ilə aylıq qazancından dövlət nəfinə 20% məbləğində pul tutulmaqla o, 2 il müddətə islah işləri cəzasına məhkum edilmişdi. Hökmündən narazı qalan dövlət ittihamçısı apellyasiya protesti, məhkum və zərərçəkmiş şəxs apellyasiya şikayətləri vermişdi. Bakı Apellyasiya Məhkəməsinin hökmü dəyişdirmədən saxlamışdı. Daha sonra dövlət ittihamçısı apellyasiya protesti ilə Ali Məhkəməyə müraciət etmişdi. Qərara əsasən, Bakı Apellyasiya Məhkəməsinin qərarı ləğv olunmuş və cinayət işinin apellyasiya instansiyası məhkəməsində yenidən baxılması qərara alınmışdı.
