Heqset Ukraynanın təhlükəsizliyini ABŞ-ın təhlükəsizliyi kimi qiymətləndirmir
ABŞ müdafiə naziri Pit Heqset Ukraynanın təhlükəsizliyinin ABŞ-ın təhlükəsizliyi ilə eyniləşdirilməsinə qarşı çıxıb.
AFN.az xəbər verir ki, o bu barədə ABŞ Konqresinin Nümayəndələr Palatasının Silahlı Qüvvələr Komitəsində keçirilən dinləmələr zamanı bildirib.
Dinləmələrdə çıxış edən Kaliforniyadan olan demokrat konqresmen Con Garamendi bildirib ki, Ukraynanın təhlükəsizliyi ABŞ-ın təhlükəsizliyidir. "Bir gün əvvəl Senatda səsləndirdiyiniz bəyanatlar ABŞ prezidenti Donald Trampın “Ukraynanın tam təslim olmasına və Rusiyanın tam qələbəsinə” qarşı olmadığını göstərirmi?" - deyə o, Heqsetdən soruşub.
“Bu, mənim bəyanatımın xarakteri olmayıb. Biz hesab edirik ki, sülh bütün maraqlı tərəflərin maraqlarına cavab verir. Amma mən qeyd edərdim ki, Ukrayna – bu, ABŞ deyil və Ukrayna NATO üzvü deyil. ABŞ-ın təhlükəsizliyi ilə Ukraynanın təhlükəsizliyi arasında belə bir paralel aparmaq düzgün deyil” - deyə ABŞ müdafiə naziri cavabında deyib.
Bununla belə, Heqset əlavə edib ki, ABŞ sülhə ümid edir və bu, Amerikanın maraqlarına cavab verir: “Əgər Ukraynaya yatırılan milyardlarla dolları nəzərdən keçirsəniz, bunu ABŞ-ın təslim olması kimi xarakterizə etmək çətindir”.
Nazirin fikrincə, Ukraynadakı mövcud cəbhə xətti yavaş-yavaş dəyişir və heç kim gələcəkdə bu sülhün necə görünəcəyini əminliklə deyə bilməz: “Ancaq prezident Tramp sülhə nail olmaq üçün başqalarından daha çox çalışır”. Heqset onu da qeyd edib ki, ABŞ Ukraynaya silah və hərbi texnika tədarükünü davam etdirir.
