Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov sabit tarifin cəmiyyətdə müzakirələrə yol açmasına, öz mənzilində yaşamayanların da ödəniş etmələri barədə qaydaların etiraz doğurmasına münasibət bildirib.
Bu barədə Pravda.az-a açıqlama verən deputat bildirib ki, məsələyə əvvəlcə sabit tarifin məqsədi və dövlətin bu istiqamətdə yürütdüyü siyasət kontekstindən baxmaq lazımdır.
O deyib ki, sabit tarifin tətbiqində əsas məqsəd kommunal xidmətlərin davamlı maliyyələşdirilməsini təmin etməkdir:
“Dövlət insanların istifadə etməsindən asılı olmayaraq, infrastrukturun dayanıqlı qalması, xidmətlərin fasiləsiz şəkildə göstərilməsi və texniki baxımların həyata keçirilməsi üçün bu cür tariflərə ehtiyac duyur. Azərbaycanda hələ 2021-ci il üzrə dövlət büdcəsində kommunal xidmətlərin xərcləri, təxminən, 1,5 milyard manat təşkil edib. Bu rəqəm yalnız su, qaz, elektrik və kanalizasiya xidmətlərinin deyil, həm də bu xidmətləri təmin edən infrastrukturların saxlanması üçün lazım olan vəsaitin böyük bir hissəsini əks etdirir. İstifadə olunsa da, olunmasa da, bu sistemlərin işlək qalması üçün təmir, yeniləmə və texniki xidmətlər davamlı olaraq aparılmalıdır. Təsəvvür edin, bu rəqəm hər il artan xətt üzrə getməkdədir. Bununla yanaşı, əhalinin artan gəlirlərini də nəzərə almaq lazımdır. Yaddan çıxarmayaq ki, dövlətin perspektivində sabit tarifin tətbiqi, bu xidmətlərin dayanıqlı maliyyələşdirilməsi və infrastrukturun müasir tələblərə cavab verməsi dayanır. Məhz bu səbəbdən qərar tam doğrudur və mövcud reallığı əks etdirir. Əgər biz xarici ölkələrin də praktikasına əsaslansaq, artıq bu təcrübənin illərdir, davam etdiyini görmüş olarıq. Hazırda məsələ üzərində iş getdiyindən bir qədər səbirli olmalıyıq. Çünki qərarın əsl məqsədi sabit tarifin tətbiqi ilə sosial ədalətsizliyi artırmaq və dövlətə olan inamı azaltmaq deyil. Buna görə alternativ yanaşmalar və təkliflər irəli sürülə bilər. Məsələn, boş evlər üçün minimal tariff, yaşayışın sübutu ilə güzəştlər, sosial qruplara güzəştlər və s. Bütün bunların təbliği və təşviqində medianın da rolu böyükdür. Belə ki, məhz media ictimaiyyətlə düzgün əlaqə qurmalı, qərarın səbəbləri və faydalarını izah etməli, ədalətə əsaslanan yanaşmanı kütlələrə çatdırmalıdır. İnanıram ki, qərar yalnız iqtisadi deyil, həm də sosial baxımdan qalıcı və müsbət nəticələrə gətirib çıxaracaq”.
Aytəkin Qardaşova
