BAKI, 13 iyun. TELEQRAF
İsrail Baş naziri Benyamin Netanyahu və Prezident İsxak Hersoqun təyyarəsi təhlükəsizlik məqsədi ilə ölkədən çıxarılıb.
Teleqraf xəbər verir ki, bu barədə yerli media məlumat yayıb.
Qeyd olunub ki, bu, təhlükəsizlik məqsədilə edilib.
Vurğulanır ki, bu addım İranın yüzlərlə dron hücumu fonunda baş verib. Yerli medianın bildirdiyinə görə, təyyarələr Yunanıstanın paytaxtı Afinadadır.
Xatırladaq ki, İsrail Hərbi Hava Qüvvələri iyunun 13-də səhər saatlarında İrana zərbələr endirib. Hücum zamanı ölkənin Fordo və Natantz nüvə obyektləri, eləcə də hərbi bazaları hədəfə alınıb. İranın Atom Enerjisi Təşkilatı Natanz nüvə obyektinin məhv edildiyini təsdiqləyib.
Hava əməliyyatları nəticəsində İran İslam İnqilabı Keşikçiləri Korpusunun baş komandanı general-mayor Hüseyn Salami, Silahlı Qüvvələrin Baş Qərargah rəisi general-leytenant Məhəmməd Hüseyn Baqiri, ali dini rəhbərin müşaviri Əli Şamxani, “Hatəm-əl-Ənbiya” Qərargahının rəisi Qulam Əli Rəşid və digər yüksək rütbəli şəxslər, o cümlədən üç nüvə alimi həlak olub.
İran isə bir neçə saat sonra cavab zərbələrinə başlayıb. Tehran İsrail istiqamətində 100-dən çox pilotsuz təyyarə göndərib.
