Hazırda Ağdam rayonunda “Sarıcalı 008” sahəsinin minalardan təmizlənmə prosesi yekunlaşmaq üzrədir.
“Report”un Ağdama ezam olunan əməkdaşı xəbər verir ki, bunu Azərbaycan Respublikası Minatəmizləmə Agentliyinin (ANAMA) İdarə Heyətinin sədri Vüqar Süleymanov jurnalistlərə açıqlamasında deyib.
Onun sözlərinə görə, hazırda mina təmizləmə əməliyyatları rayonun Sarıcalı kəndi ərazisində buraya köçürülən əhaliyə kənd təsərrüfatı məşğuliyyəti məqsədilə ayrılmış ərazidə aparılır:
“Böyük Qayıdış" planına uyğun olaraq artıq əhalinin işğaldan azad olunmuş ərazilərə köçürülərək məskunlaşması prosesi davam etdirilir. Birinci mərhələ olaraq biz Sarıcalı kəndinin ərazisini təmizləmişik. İkinci mərhələ kimi Sarıcalı kəndinin ətrafında kənd təsərrüfatı təyinatlı torpaqlar təmizlənməlidir ki, kənd əhalisi burada çalışa bilsin.
Sarıcalı kəndi keçmiş təmas xəttinə düşən ərazilərdən biridir. Burda təxminən 30 il ərzində minalanma baş verib. Həddindən artıq minalarla çirklənmə var. Amma bizim qüvvələr burada kifayət qədər uğurla çalışırlar. Hazırda "Sarıcalı 008" sahəsinin minalardan təmizlənmə prosesi yekunlaşmaq üzrədir. Bundan sonra növbəti əraziyə keçiləcək”.
V.Süleymanov müharibədən sonra minalardan təmizlənən ərazilər və tapılan hərbi sursatlar barədə də məlumat verib:
“Ümumiyyətlə, 44 günlük Vətən müharibəsindən sonra Ağdam rayonu üzrə 35 min hektara yaxın ərazi mina və partlamamış hərbi sursatlardan təmizlənib. Minatəmizləmə fəaliyyəti işğaldan azad olunmuş bütün rayonlarla yanaşı, Qazax rayonunda da icra olunur. Bu günə qədər 206 min hektardan çox ərazi mina və partlamamış hərbi sursatlardan tamamilə təmizlənib, 199 minə yaxın mina və partlamamış hərbi sursatlar aşkarlanaraq zərərsizləşdirilib”.
