ain.az bildirir, Pravda.az portalına istinadən.
Ali Məhkəmədə Suraxanı rayonunda tanışını bıçaqlayaraq öldürməkdə təqsirli bilinən Rza Bayramovun barəsindəki qərardan verilən kassasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Ələsgər Novruzovun sədrliyi ilə keçirilən prosesdə qərar elan olunub.
Qərara əsasən, kassasiya şikayəti təmin edilməyib.
Qeyd: Hadisə 2016-cı ildə Bakının Suraxanı rayonunun Binə qəsəbəsində baş verib.
Belə ki, qəsəbə sakini Rza Bayramov münaqişə zəminində Bakı şəhər sakini Elşən Qafarovu bıçaqlayıb. Elşən Qafarov hadisə yerində ölüb. Hadisəni törədən Rza Bayramov polisə gələrək təslim olub. Hadisənin təhqir üstündə baş verdiyi bildirilib.
Bakı Ağır Cinayətlər Məhkəməsinin 9 iyun 2017-ci il tarixli hökmü ilə o, 16 il müddətinə azadlıqdan məhrum edilib. Hökmdən dövlət ittihamçısı apellyasiya protesti, zərərçəkmiş şəxsin hüquqi varisinin nümayəndəsi və məhkumun müdafiəçisi apellyasiya şikayətləri verib. Bakı Apellyasiya Məhkəməsinin 25 avqust 2017-ci il tarixli qərarı ilə apellyasiya şikayətləri təmin edilməyib, apellyasıya protesti qismən təmin edilib, Bakı Ağır Cinayətlər Məhkəməsinin hökmü dəyişdirilib. Onun cəzası 17 il 6 aya qaldırılıb.
Bakı Apellyasiya Məhkəməsinin qərarından Rza Bayramovun müdafiəçisi kassasiya şikayətinin verilməsi üçün buraxılmış prosessual müddətin bərpa olunmasına dair vəsatət verib. Həmin vəsatətə baxan Bakı Apellyasiya Məhkəməsinin Cinayət Kollegiyasının 16 yanvar 2025-ci il tarixli qərarı ilə kassasiya şikayəti verilməsi üçün buraxılmış prosessual müddətin bərpasına dair vəsatət əsassız olduğuna görə təmin edilməyib. Daha sonra həmin qərarından məhkum müdafiəçisi kassasiya şikayəti verib.
Kamal Məmmədov
Hadisənin gedişatını izləmək üçün ain.az saytında ən son yeniliklərə baxın.
