Bu axşam AzTV-nin yaydığı, sonradan yalan olduğu ortaya çıxan bir xəbər geniş rezonansa səbəb oldu. Telekanal rəsmi şəkildə tamaşaçılardan üzr istədi və etiraf etdi ki, təqdim edilən məlumat düzgün yoxlanmamış və dezinformasiyaya çevrilmişdir. Bu, təkcə bir medianın səhvi deyil, dövlət televiziyasının informasiya siyasətində ciddi boşluğun siqnalıdır.
AzTV-nin etirafı o deməkdir ki, "sosial şəbəkələrə uduzmuşuq". Bu, sadəcə bir təsbit deyil, həm də bir həyəcan siqnalıdır. Artıq informasiya müharibəsinin ən ön cəbhəsində sosial şəbəkələr dayanır. Bu platformalar sürətli, cəlbedici və manipulyativ informasiya yayımı ilə ənənəvi mediaya meydan oxuyur. Əgər dövlətə bağlı media qurumları bu dinamikanı düzgün qiymətləndirməsə, cəmiyyətin informasiya təhlükəsizliyi ciddi zərbə ala bilər.
Bəs nə etməli? Hibrid müharibədə necə qalib gəlməli?
Birincisi, dövlət televiziyaları yalnız rəsmi xəbərlərlə kifayətlənməməli, operativ araşdırma, fakt yoxlaması və çevik reaksiya mexanizmlərini gücləndirməlidir.
İkincisi, rəqəmsal platformalara uyğunlaşma sürətləndirilməli, sosial media komandaları peşəkarlarla gücləndirilməli və informasiya rəqabətində təşəbbüs əldən verilməməlidir.
Üçüncüsü, ictimai etimadı qorumaq üçün şəffaflıq və məsuliyyət prinsipi önə çəkilməlidir. Çünki bir dəfə yayılan yalan xəbər yalnız reytinqə yox, illərlə formalaşmış etimad deposuna da zərbə vurur.
Bu, bütün media subyektlərinə dərs olmalıdır.
Nəticə etibarilə, AzTV-nin üzrü bir zəifliyin deyil, doğru bir başlanğıcın simvoluna çevrilməlidir. Çünki informasiya dövründə güclü olmaq yalnız texniki imkanlarla deyil, informasiya məsuliyyəti və etibarı ilə mümkündür.
Elnurə
