İçərişəhərdə yerləşən Şirvanşahlar Kompleksinin yuxarı hissəsindəki Seyid Yəhya Bakuvi türbəsi ətrafında təşkil edilən konsert proqramı sosial şəbəkələrdə ciddi qınaq obyektinə çevrilib. Belə ki, konsertdə çıxış edən xanımın açıq-saçıq geyimi ictimaiyyət nümayəndləri tərəfindən etirazla qarşılanıb. Bildirilib ki, Şirvanşahların, Azərbaycanın dəyəri olan Seyid Yəhya və digər övliyaların qəbri başında bu cür çılpaq şəkildə çıxışlar edilməsi milli-mədəni dəyərlərimizə hörmətsizlikdir. Konsertə icazə verdiyi üçün “İçərişəhər” Dövlət Tarix-Memarlıq Qoruğu İdarəsi tənqid edilib.
Qoruqdan Pravda.az-ın sorğusuna cavab olaraq bildirilib ki, qurum Bakuvi Türbəsi ətrafında keçirilən musiqi proqramı ilə bağlı səslənən fikirləri anlayışla qarşılayır.
“Tarixi məkanlara olan həssaslıq bizim üçün hər zaman önəmlidir. Bu abidələrin mədəni həyatın bir parçası olaraq yaşadılması və tanıdılması da vacibdir. Xüsusən də, gənc nəsilə. Sözügedən tədbir zamanı heç bir yüksək səsləndirici avadanlıqdan istifadə olunmayıb, qeyri-etik rəqs və ya davranış nümayiş etdirilməyib. Proqram sakit, estetik və mədəni şəkildə təqdim olunub. Şirvanşahlar Sarayı Kompleksi, ümumilikdə, İçərişəhər bu kimi mədəni layihələrə dəfələrlə ev sahibliyi edib. Gələcəkdə də bu cür layihələrin həyata keçirilməsi zamanı ictimai rəylər və həssaslıqlar diqqətlə nəzərə alınacaq. İçərişəhərdə keçirilən tədbirlərə göstərdiyiniz diqqət və münasibətə görə təşəkkürümüzü bildiririk”, - açıqlamada qeyd olunub.
Aytəkin Qardaşova
