BAKI,TurkicWorld
Türkmənistan Prezidenti Serdar Berdiməhəmmədov Aşqabadda rəsmi səfərdə olan Rusiya Federasiyasının xarici işlər naziri Sergey Lavrovu qəbul edib.
TurkicWorld xəbər verir ki, görüşdən sonra açıqlama verən Lavrov, Berdiməhəmmədovla keçirilən danışıqların “çox məhsuldar və konstruktiv” keçdiyini bildirib.
O vurğulayıb ki, Rusiya və Türkmənistan arasında əməkdaşlıq getdikcə dərinləşir və bunun ən mühüm istiqamətlərindən biri Şimal–Cənub nəqliyyat dəhlizinin həyata keçirilməsidir.
“Bu layihə regionun logistika potensialını gücləndirəcək və Avrasiya qitəsinin inkişafında Türkmənistanın rolunu artıracaq. Həmçinin Şimal və Cənub dənizlərini birləşdirən sabit əlaqə qurulacaq” – deyə Lavrov bildirib.
Nazir əlavə edib ki, görüş zamanı tərəflər hökumətlərarası əməkdaşlıq komissiyasının növbəti iclasının tarixini müəyyənləşdirmək barədə də razılığa gəliblər.
Qeyd edək ki, Sergey Lavrov sonuncu dəfə 2022-ci ildə Aşqabadda səfərdə olub. Bu dəfəki səfər isə Rusiya-Türkmənistan münasibətlərinin inkişafı baxımından əhəmiyyətli diplomatik hadisə hesab olunur.
