İspaniya yığmasının baş məşqçisi Luis de la Fuente cari mövsümün “Qızıl top” mükafatı ilə bağlı sualı cavablayıb.
Arena.az “Marca” nəşrinə istinadən, 64 yaşlı ispan mütəxəssisin müvafiq cavabını təqdim edir:
“Mən istərdim ki, mükafatı ispan oyunçu alsın. Lamin Yamal və ya Pedri – onların hər ikisi çox yaxşıdırlar, mən onlara xüsusi bağlılıq duyuram. Belə ki, onların hər ikisi mənim rəhbərliyim altında debüt ediblər: Lamin – əsas yığma komandada, Pedri isə – gənclər komandasında”, deyə De la Fuente vurğulayıb.
Xatırladaq ki, hazırda əksər aparıcı nəşrlər cari mövsümün “Qızıl top” mükafatını qazanmağa əsas namizəd olaraq, PSJ-nin 28 yaşlı fransalı sağ cinah hücumçusu Usman Dembeleni göstərirlər.
