ain.az, 525.az portalına istinadən məlumat verir.
Bakıda “İqtisadi və turizm əməkdaşlığı vasitəsilə Malayziya-Azərbaycan əlaqələrinin gücləndirilməsi” mövzusunda ticarət, biznes və turizm seminarı və "2026: Malayziyaya səyahət ili" kampaniyasının rəsmi açılışı keçirilib.
525.az xəbər verir ki, çıxış edən Malayziyanın Azərbaycandakı səfiri Əhməd Kamrizamil Bin Mohd Rza deyib ki, bu xüsusi gündə ikitərəfli münasibətlərimizdə daha bir əlamətdar məqamı qeyd edirik. Belə ki, bu tədbir Malayziyanın Bakıdakı Səfirliyi ilə Malayziyanın əsas qurumları arasında təşkil edilən ilk proqramdır. Bu qurumlar, Malayziya Xarici Ticarətin İnkişafı Korporasiyası – MATRADE, Malayziya İnvestisiyaların İnkişafı İdarəsi – MIDA, Malayziya Palma Yağı Şurası – MPOC və Turizm Malayziya qurumu Azərbaycandakı tərəfdaşlarımızla əməkdaşlığı daha da dərinləşdirmək məqsədilə birgə səylə çalışıblar:
"Ümid edirəm ki, bu tədbir təkcə bir ilk olmayacaq, həm də irəliyə doğru müsbət bir başlanğıc olacaq, yəni, biznes, ticarət, investisiya və turizm sahələrini əhatə edən, ölkələrimiz arasında davamlı və uzunmüddətli tərəfdaşlığın təməlini qoyacaq".
Diplomat vurğulayıb ki, ikitərəfli ticarət sahəsində effektiv nailiyyətlər əldə edilib: "Malayziya və Azərbaycan arasında iqtisadi tərəfdaşlıqda mühüm bir mərhələni vurğulamaqdan məmnunluq duyuram, ötən il Malayziya ilə Azərbaycan arasında ikitərəfli ticarət dövriyyəmiz 26 milyon ABŞ dollarına çatıb. Bu rəqəm xüsusilə əhəmiyyətlidir, çünki qısa müddət ərzində əldə etdiyimiz effektiv artımı əks etdirir".
Səfir Əhməd Kamrizamil Bin Mohd Rza Malayziyada investisiya imkanlarından da söz açıb. Əlavə edib ki, Malayziyanın Cənub-Şərqi Asiyada yerləşməsi ona dünyanın hava və dəniz ticarət marşrutlarının qovşağında strateji mövqe qazandırır. Ölkə Asiyanın əsas limanları ilə yaxşı əlaqələndirilib və bu da aparıcı bazarlara effektiv çıxışı təmin edir.
2024-cü ildə Malayziyada daxili investisiyalar 80 milyard ABŞ dolları (378.5 milyard RM) səviyyəsində qeydə alınıb. Bu məbləğin 45 faizi və ya 32 milyard ABŞ dolları xarici investorların payına düşür. Əsas investor ölkələr arasında Sinqapur, ABŞ, Çin, Böyük Britaniya, Cənubi Afrika, Avstraliya və Tayvan yer alır.
Maraqlı nümunələr: Amazon Web Services (AWS): Amazon, 2038-ci ilədək 6.2 milyard ABŞ dolları (29.2 milyard RM) sərmayə yatıracağını açıqlayıb. Bu sərmayə yeni AWS Asiya-Sakit Okean (Malayziya) regionunun istifadəyə verilməsi ilə bağlıdır və 12.1 milyard ABŞ dolları iqtisadi təsir və ildə 3,500-dən çox iş yeri yaradacağı gözlənilir. (qeyri-rəsmi rəqəmlər) Google: Google Malayziyada ilk məlumat mərkəzi və Google Cloud regionunu qurmaq üçün 2 milyard ABŞ dolları (9.4 milyard RM) sərmayə yatıracaq. Bu layihə 2030-cu ilə qədər 26,500 yeni iş yeri yaradacaq və təxminən 3.2 milyard ABŞ dolları iqtisadi təsir gözlənilir. Tesla: Tesla Malayziyada öz elektromobillərini satışa çıxarıb, salonlar və enerji doldurma infrastrukturu yaradıb. Lakin Google və Amazon səviyyəsində rəsmi sərmayə rəqəmi hələlik açıqlanmayıb.
Bu faktlar Malayziyanın sabit və investor dostu siyasətinə olan qlobal etimadı əks etdirir. Bu, güclü iqtisadi əsaslar, inkişaf etmiş infrastruktur və ixtisaslı işçi qüvvəsi ilə dəstəklənir.
"Arzum budur ki, bu təqdimat qarşılıqlı faydalı əlaqələrin qurulmasına şərait yaratsın və siz Malayziyada biznes qurmağın real potensialını dəyərləndirə biləsiniz. Məlumat üçün qeyd edim ki, MIDA – bir pəncərəli investisiya agentliyidir və istənilən potensial investor üçün A-dan Z-yə qədər tam dəstək göstərməyə hazırdır. MIDA, həmçinin beynəlxalq səviyyədə investorlar üçün xüsusi təşviq paketləri hazırlayan peşəkar mütəxəssisləri ilə tanınır. Bu da onu unikal edən xüsusiyyətlərdən biridir",- səfir deyib.
Malayziyaya investisiya qoymağın üstünlüklərinə toxunan diplomat deyib ki, Malayziyaya sərmayə qoymaq azərbaycanlı investorlar üçün ASEAN ölkələrindəki 680 milyondan çox insanın daxil olduğu geniş bir bazara çıxış imkanı yaradır: "Bu çıxış RCEP (Regional Comprehensive Economic Partnership), CPTPP (Comprehensive and Progressive Agreement for Trans-Pacific Partnership), ASEAN Azad Ticarət Zonası (AFTA) və Çin–ASEAN Azad Ticarət Sazişi (CAFTA) kimi ticarət razılaşmaları ilə möhkəmləndirilib. Şübhəsiz ki, Malayziya azərbaycanlı investorlar üçün Asiya-Sakit Okean regionunda, hətta Okeaniya ölkələrinə qədər genişlənmək istəyənlər üçün strateji bir başlanğıc nöqtəsi və dayaq platformasıdır".
Diplomat əlavə edib ki, turizm nümayəndələri də bu tədbirdə iştirak edir: "Onlar Azərbaycanın turizm və aviaşirkət agentlikləri ilə potensial əməkdaşlıq və tanıtma imkanları barədə təqdimat keçirəcəklər. Daha da əhəmiyyətlisi odur ki, malayziya hökuməti 2026-cı ili "MALAYZİYAYA SƏYAHƏT İLİ" olaraq elan edib. Əhməd Kamrizamil Bin Mohd Rza söyləyib ki, bu gün Malayziya–Azərbaycan münasibətlərində yeni bir səhifə açılır: "Biz bu ilk seminarı təşkil etməklə, daha güclü iqtisadi əlaqələrin təməlini, xalqdan-xalqa münasibətlərin möhkəmlənməsinivə daha dərin dostluqların yaranmasını təşviq edən toxumları əkirik. Qoy bugünkü tədbir fürsətlərə, qarşılıqlı hörmətə və ortaq rifaha əsaslanan, davamlı və mənalı bir yolun başlanğıcı olsun".
Daha sonra "2026: Malayziyaya səyahət ili" kampaniyasının açılışı olub.
Ardınca tədbir yuxarıda qeyd edilən mövzular üzrə təqdimatlar olub.
Pərvanə Sultanova
Bakıda "Malayziyaya səyahət ili"nin açılışı olub
Bakıda "Malayziyaya səyahət ili"nin açılışı olub
Bakıda "Malayziyaya səyahət ili"nin açılışı olub
Bakıda "Malayziyaya səyahət ili"nin açılışı olub
Şəkil sayı: 4
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
