ain.az, Sia Az portalına istinadən məlumat verir.
"Regionlarda idman infrastrukturunun zəifliyi uzun illərdir ki, idman sahəsinin inkişafına və gənclərin bu sahəyə cəlb olunmasına ciddi maneə törədir. Bu məsələ, sadəcə idmanla məşğul olmaq istəyən fərdlərin qarşılaşdığı fiziki çətinliklərlə məhdudlaşmır, həm də geniş sosial və psixoloji nəticələrə səbəb olur". Bu sözləri SİA-ya açıqlamasında baş məşqçi Arif Əsədov deyib.
.jpg)
Onun sözlərinə görə, idman infrastrukturu sadəcə stadion və idman zalı deyil. Bu, eyni zamanda gənclərə stimul verən, onları yönləndirən və cəmiyyətə sağlam, sosial baxımdan aktiv fərdlər kimi qazandıran bir mühitdir. Təəssüf ki, Azərbaycanın bir çox bölgələrində bu mühit ya çox zəifdir, ya da tamamilə yox səviyyəsindədir: "Kənd və rayonlarda idmanla məşğul olmaq istəyən gənclər, çox zaman sadə məşq şəraiti belə tapa bilmirlər. Əksər hallarda köhnəlmiş məktəb idman zalları və ya bərbad vəziyyətdə olan açıq stadionlar onların yeganə seçimidir. Bu cür şəraitdə gənclərin motivasiyası azalır və onlar istər-istəməz idmandan uzaqlaşırlar. İdmanla məşğul olmaq üçün uyğun şəraitin olmaması birbaşa olaraq gənclərin fiziki və psixoloji sağlamlığına təsir edir. Məsələn, idmanla məşğul olan yeniyetmələrdə stress, aqressiya, diqqət pozuntusu kimi hallar daha az müşahidə olunur. Lakin idman mühiti olmayan regionlarda bu cür problemlər artmaqda davam edir. Gənclər boş vaxtlarını daha çox passiv fəaliyyətlərə – sosial şəbəkələrdə vaxt keçirməyə, ya da bəzi hallarda zərərli vərdişlərə sərf edirlər.
Bundan əlavə, idmanın inkişaf etmədiyi regionlarda istedadlı gənclər də tanınmadan, dəstəklənmədən, inkişaf etmədən sıradan çıxırlar. Halbuki, lazımi şərait yaradılarsa, həmin bölgələrdən ölkə və dünya səviyyəli idmançılar yetişə bilər. Sadəcə olaraq, bu gənclərə özlərini göstərmək və inkişaf etdirmək üçün imkan verilməlidir.
Gənclər üçün idman yalnız bir fiziki fəaliyyət deyil – bu, həm də sosiallaşma, komanda ruhu, məsuliyyət, liderlik kimi həyati vacib bacarıqları öyrədən bir məktəbdir. İdmanla məşğul olan gənc cəmiyyətdə daha fəal olur, özünəinamı artır, məqsədyönlü olmağı öyrənir. Bütün bunlar sağlam və uğurlu gələcəyin təməlidir. Ona görə də bu imkanlardan region gənclərinin məhrum qalması çox ciddi bir sosial problemdir. Mən bir idman mütəxəssisi kimi düşünürəm ki, dövlət və yerli icra orqanları bu məsələyə xüsusi önəm verməlidir. Regionlarda müasir idman komplekslərinin inşası, məktəblərdə idman dərslərinin daha keyfiyyətli keçirilməsi, peşəkar məşqçilərin bölgələrə cəlb olunması və gənclər üçün idman müsabiqələrinin təşkil olunması mühüm addımlar olardı.
Əgər biz sağlam, enerjili, özünə inanan və məsuliyyətli bir gənc nəsil yetişdirmək istəyiriksə, ilk növbədə onlara düzgün şərait yaratmalıyıq. İdman bu işdə ən güclü alətlərdən biridir. Amma o alətdən faydalana bilmək üçün regionlarda real addımlar atılmalıdır. Əks halda, bölgə gəncləri həm sosial aktivlikdən, həm də potensiallarını üzə çıxarmaq fürsətindən məhrum qalmağa davam edəcək".
Hadisənin gedişatını izləmək üçün ain.az saytında ən son yeniliklərə baxın.
