Yay mövsümündə uşaqlara verilən dondurmanın miqdarı valideynlərin diqqət yetirməli olduğu vacib məqamdır. AzPost xəbər verir ki, diyetoloq və terapevt Asiya Bayçorova uşaqlar üçün dondurmanın təhlükəsiz porsiyası barədə danışıb. Onun sözlərinə görə, dondurma enerji verir, əhvalı yüksəldir və süddən hazırlanarsa kaliumla zəngindir. Lakin bu, onun məhdudiyyətsiz qəbul oluna biləcəyi anlamına gəlmir.
Mütəxəssis xəbərdarlıq edir ki, dondurma əsas yeməkləri əvəz etməməlidir və ucuz, tərkibi şübhəli olan məhsullardan uzaq durulmalıdır. Bayçorovanın fikrincə, 2 yaşa qədər uşaqlara dondurma ümumiyyətlə verilməməlidir. Üç-beş yaş arası uşaqlar üçün həftədə 2-3 dəfə, maksimum yarım stəkan (təxminən 50 qram) dondurma kifayət edir. Altı-on yaşlı uşaqlara isə icazə verilən miqdar 80-100 qram arasında dəyişməlidir.
Diyetoloq qeyd edib ki, problem adətən porsiyalar böyüdükdə və bu məhsul gündəlik pəhrizdə müntəzəm yer tutduqda yaranır. Həddindən artıq dondurma qəbul edən uşaqlarda iştaha pozğunluğu, qarın ağrısı və digər mədə-bağırsaq problemləri müşahidə oluna bilər. Eyni zamanda, məhsulun tərkibində süni rəngləndiricilər və trans yağlar olduqda risk daha da artır.
Bayçorova əlavə edib ki, yüksək keyfiyyətli və tərkibi təmiz olan dondurmadan nadir hallarda və doğru miqdarda istifadə edildikdə, bu, uşağın sağlamlığına zərər verməyəcək.
