Beynəlxalq reytinq agentliyi "Moody’s"in qiymətləndirməsinə görə, hazırda və gələcəkdə həyata keçirilən islahatlar fonunda Azərbaycanın investisiya reytinqi artırıla bilər.
FED.az xəbər verir ki, bu barədə agentliyin Azərbaycan üzrə yeni reytinq bəyanatında qeyd olunub.
“Gözlənilən dəyişikliklər dövlət institutlarına olan etimadı gücləndirəcək və onların uzunmüddətli çağırışlara uyğunlaşma qabiliyyətini artıracaq. Reytinqin artırılmasına töhfə verəcək əlavə amil kimi ölkədə iqtisadiyyatın şaxələndirilməsi istiqamətində atılan addımların effektivliyinin daha aydın görünməsi göstərilə bilər. Bu, həm neft qiymətlərinin dalğalanmasından, həm də qlobal azkarbonlu iqtisadiyyata keçidin təsirlərindən asılılığın azalmasına kömək edəcək. Ermənistanla iqtisadi və diplomatik münasibətlərin əhəmiyyətli dərəcədə yaxşılaşması, geosiyasi gərginliyin yenidən artması riskini azaldacaq və bu da reytinqə müsbət təsir göstərəcək", - bəyanatda vurğulanır.
Agentlik qeyd edir ki, reytinq üzrə təsdiqlənmiş “müsbət” proqnoz qısamüddətli perspektivdə onun aşağı salınması ehtimalının az olduğunu əks etdirir.
Bu gün "Moody’s" Azərbaycanın suveren kredit reytinqini "Ba1" səviyyəsindən "Baa3" səviyyəsinə qaldıraraq ölkəyə investisiya reytinqi verib. Reytinq üzrə proqnoz “müsbət” olaraq təsdiqlənib.
Eyni zamanda, "Moody’s" bildirir ki, Azərbaycanın mövcud uzunmüddətli emitent reytinqi "Baa3" olsa da, bu göstərici agentliyin daxili metodologiyası üzrə hesablanmış yekun qiymətləndirmədən ("A3-Baa2") aşağıdır. “Müsbət” proqnoz ölkənin kredit qabiliyyətinə artan təzyiqin olduğunu göstərir.
“Sxematik qiymətləndirmə üzrə ilkin qiymətlə (A1–A3) yekun qiymət arasındakı fərq Azərbaycanın məhdud, lakin yaxşılaşan iqtisadi şaxələndirməsi, həmçinin oxşar ölkələrlə müqayisədə nisbətən zəif innovasiya imkanları və daha dar iqtisadi mürəkkəblik ilə izah olunur. Nəticədə iqtisadi dayanıqlılıq üzrə yekun qiymətləndirməmiz "ba1" səviyyəsindədir, halbuki ilkin qiymət "baa2" idi”, - sənəddə bildirilir. (Report)
