İqlim dəyişikliyi bütün dünya ölkələri üçün təhlükə yaradır.
Senzor.az bildirir ki, bunu Qırğız Respublikasının Prezidenti Sadır Japarov İqtisadi Əməkdaşlıq Təşkilatının (ECO) 17-ci Zirvə görüşündə çıxışı zamanı deyib.
O, sammitin Xankəndidə keçirilməsinin xüsusi əhəmiyyət daşıdığını deyərək Prezident İlham Əliyevə təşəkkür edib.
S.Japarov bildirib ki, iqtisadiyyatın inkişafı iqlim dəyişikliyi ilə sıx əlaqəlidir:
"İqlim dəyişikliyi bütün dünya ölkələri üçün təhlükə yaradır. Enerji sektoru da daxil olmaqla həyatın bütün sahələrinə yenidən baxmağı vacib edir. Bərpa olunan enerji sahələrinin artılması və digər istiqamətlərdə səylərimizi artırmağa çağırıram. Biz 2027-ci ildə "Bişkek+25" İkinci Qlobal Dağ Sammitinə ev sahibliyi edəcəyik".
Qırğızıstan Prezidenti vurğulayıb ki, hazırda ən əhəmiyyətli layihələrdən biri Çin-Qırgızıstan-Özbəkistan dəmiryoludur: "Onun tikintisi ölkələrimiz arasında əlaqəni sürətləndirəcək, iqtisadiyyatın inkişafına töhfə verəcək. Biz virtual təhlükəsizliyin gücləndirilməsi, kibercinayətkarlığın azaldılması istiqamətində əməkdaşlıqda maraqlıyıq".
S.Japarov bugünkü Zirvə görüşünün Yaxın Şərqdəki gərgin vəziyyət fonunda keçdiyini söyləyib: "İran və İsrail münaqişəsinin gərginləşməsi bütün regionda təhlükəli vəziyyət formalaşdırır. Qırğızıstan sülh və beynəlxalq hüquq çərçivəsində məsələnin həllinin tərəfdarıdır".
Dövlət başçısı həmçinin ECO üzvləri arasında ticarət dövriyyəsini artırmaq üçün addımlar atılmasının vacib olduğunu qeyd edib: "Eyni zamanda, ölkələr arasındakı nəqliyyət-logistika imkanları asanlaşdırılmalı, viza-gömrük proseslərinə baxmalyıq. Təklif edirik ki, dənizə çıxışı olan ölkələrdə liman xidmətləri üçün azaldılmış tariflər olsun. Bütün bu sahələrin inkişafı üçün xarici investorlara imkanlar yaratmaq vacibdir".
