“Yay mövsümünün gəlişi ilə bir çox insan istirahət məqsədilə çimərliklərə üz tutur. Dəniz sularında çimmək istər fiziki, istərsə də psixoloji baxımdan müsbət təsirə malik olsa da, suyun gigiyenik keyfiyyəti bu prosesdə olduqca mühüm rol oynayır. Görünüşcə təmiz olan su belə, sanitar-epidemioloji baxımdan təhlükə yarada bilər. İyun və iyul aylarında küləkli hava şəraiti, çay və kanalizasiya axıntılarının dənizə qarışması, çimərliklərə yaxın ərazilərdə infrastrukturun yetərsizliyi nəticəsində dəniz suyu çirklənə bilər. Bu da bəzi infeksion və parazitar xəstəliklərin yayılmasına şərait yaradır”.
Bu sözləri “Yeni Sabah”a açıqlamasında infeksionist Aytən Ziyadova deyib. Həkim qeyd edib ki, çirkli dəniz suyuna məruz qalmaq nəticəsində insan orqanizmi müxtəlif xəstəliklərə yoluxa bilər:
“Bu yoluxmalar əsasən dəri, göz, qulaq, mədə-bağırsaq və sidik-cinsiyyət sistemlərinə təsir edir. Risk qrupuna isə daha çox uşaqlar, yaşlılar, hamilə qadınlar və immun sistemi zəif olan şəxslər daxildir. pizza hut
Ən çox rast gəlinən xəstəliklər arasında bakterial mənşəli infeksiyalar xüsusi yer tutur. Escherichia coli, Salmonella, Shigella kimi bakteriyalarla çirklənmiş suyun udulması və ya su ilə təmas nəticəsində insanlarda ishal, qarın ağrısı, ürəkbulanma və qusma kimi əlamətlər meydana çıxa bilər. Xüsusilə Pseudomonas aeruginosa bakteriyası xarici qulaq iltihabına (“üzgüçü qulağı”), dəridə irinli infeksiyalara və açıq yaraların çirklənməsinə səbəb ola bilər”.
A.Ziyadova virusların da dəniz suyu ilə insana yoluxa biləcəyini bildirib:
“Viruslar da çirkli dəniz suyunda mövcud ola bilər. Norovirus, Adenovirus və Enterovirus kimi viruslar mədə-bağırsaq traktına daxil olaraq kəskin ishal və qusma ilə müşayiət olunan qastroenteritə səbəb ola bilər. Bu infeksiyalar sürətlə yayıla və ictimai sağlamlıq üçün risk yarada bilər.
Parazitar infeksiyalar da yay çimərlik mövsümündə diqqət edilməli olan mühüm bir qrupdur. Giardia lamblia, Cryptosporidium və Entamoeba histolytica kimi parazitlər su vasitəsilə orqanizmə daxil olaraq qida borusu və bağırsaqlarda parazitar infeksiyalar törədə bilər. Bu, ishal, qarında köp, ağrılar və bəzən xroniki qida pozğunluqları ilə nəticələnə bilər.
Bu xəstəliklərin ilkin əlamətləri arasında ishal, ürəkbulanma, qusma, qızdırma, dəridə qızartı və qaşınma, göz qızartısı, qulaq ağrısı və halsızlıq yer alır. Belə simptomlar müşahidə edildikdə, insan dərhal həkimə müraciət etməlidir”.
Həkim insanlara bunları tövsiyə edir:
“Dənizdə çimməzdən əvvəl bəzi vacib qaydalara əməl edilməlidir. İlk növbədə, yalnız rəsmi olaraq təmizliyi yoxlanılmış və monitorinq nəticəsində çimməyə icazə verilmiş çimərliklərə üz tutmaq tövsiyə olunur. Suyun görünüşcə təmiz olması onun mikrobioloji cəhətdən təhlükəsiz olduğu anlamına gəlmir. Bu səbəbdən, xüsusilə axar suların yaxınlığında və ya kanalizasiya tullantılarına yaxın ərazilərdə çimməkdən çəkinmək lazımdır.
Bundan əlavə, açıq yaraları olan şəxslər dəniz suyuna girməməlidir. Çimdikdən sonra dərhal təmiz su ilə duş qəbul edilməli, göz və qulaq gigiyenasına diqqət yetirilməlidir. Uşaqların nəzarətsiz halda çirkli sularda oynamasına yol verilməməlidir. Hamilə qadınlar, immun sistemi zəif olan şəxslər isə daha ehtiyatlı davranmalı, yalnız tam gigiyenik çimərliklərdə dənizə girməlidirlər.
Sonda qeyd etmək lazımdır ki, dəniz sularında çimmək istirahətin əsas hissəsidir, lakin bu istirahətin sağlamlığa mənfi təsir göstərməməsi üçün şəxsi gigiyenaya əməl olunmalı, səlahiyyətli orqanların açıqladığı məlumatlara diqqətlə yanaşılmalıdır”.
Aytac Əliyeva
Telegram kanalımız
