Hollandiyada məktəblərdə mobil telefonların istifadəsinə qoyulan qadağa artıq real nəticələrini verməyə başlayıb. 2024-cü ilin əvvəlindən tətbiq edilən bu siyasət sinif otaqlarında diqqətin artması və sosial münasibətlərin yaxşılaşması ilə müşayiət olunub.
AzEdu.az xarici mənbədən aldığı məlumata görə xəbər verir ki, Hollandiya hökumətinin sifarişi ilə aparılan yeni tədqiqat nəticələrinə əsasən, məktəblərin böyük əksəriyyəti mobil telefonsuz tədris mühitindən razılığını bildirib. İkinci dərəcəli məktəblərin 75 faizi şagirdlərin dərslərdə daha yaxşı fokuslandığını qeyd edib. 59 faiz məktəb sosial ünsiyyətin artdığını, 28 faiz isə akademik göstəricilərdə irəliləyiş olduğunu vurğulayıb.
Məktəb rəhbərləri bildirir ki, xüsusilə aşağı siniflərdə və xüsusi təhsil ehtiyaclı şagirdlər arasında da qadağanın müsbət təsirləri özünü göstərib. Telefonların olmaması həm dərs mühitini sakitləşdirib, həm də şagirdlərin bir-biri ilə daha çox üzbəüz ünsiyyət qurmasına şərait yaradıb. Bundan başqa, onlayn zorakılıq və sosial təzyiq hallarının da azaldığı müşahidə olunub.
Təhsil Nazirliyi bu nəticələrin fonunda mobil telefon qadağasının daha uzunmüddətli və dayanıqlı tətbiqi üçün yeni hüquqi çərçivə hazırlayacağını bildirib. Qadağanın hədəfi şagirdləri daha sağlam, diqqətli və sosial baxımdan fəal təhsil mühitinə yönəltməkdir.
