Paris sakinləri 100 ildən artıq müddətdə ilk dəfə qanuni olaraq Sena çayında çimirlər. Euronews xəbər verir ki, bu gün, iyulun 5-də çayda üç çimmək zonasının rəsmi açılışı olub.
Keçən il Olimpiadadan əvvəl Sena çayında çimən Parisin meri Ann Hidalqo şənbə günü səhər zonalardan birinin açılışında idi.
Çayda üç üzgüçülük sahəsi Eyfel qülləsi, Parisin Məryəm Katedrali və Bersi rayonundakı Fransua Mitteran Kitabxanasının yaxınlığında yerləşir. Təhlükəsizlik baxımından bu xüsusi zonalardan kənarda üzmək hələ də qadağandır.
Çayın çirklənməsi və aktiv gəmiçilik səbəbindən 1923-cü ildən Sena çayında üzmək qadağan edilib. Bununla belə, keçən il Olimpiadaya hazırlıq çərçivəsində şəhər rəhbərliyi və Oyunların təşkilat komitəsi irimiqyaslı suyun təmizlənməsi layihəsinə demək olar ki, bir yarım milyard avro sərmayə qoyub və indi rəsmilərin sözlərinə görə, Sena çayı əksər günlərdə Avropanın suyun keyfiyyət standartlarına cavab verir.
