Əs-Suveida, Suriya – Suriyanın cənub-qərbində yerləşən Əs-Suveida vilayətində vəziyyət son günlər kəskin şəkildə gərginləşib.
Musavat.com xəbər verir ki, yerli druz silahlı dəstələri ilə bədəvi tayfalar arasında başlayan qarşıdurmalar artıq Suriya dövlət qüvvələrinin birbaşa müdaxiləsi ilə anti-terror əməliyyatına çevrilib.
Rəsmi əməliyyat və hökumətin mövqeyi:
Suriya hökuməti bu əməliyyatları “ölkə daxilində qanunsuz silahlı qruplaşmaların zərərsizləşdirilməsi və təhlükəsizliyin bərpası üçün həyata keçirilən anti-terror tədbirləri” kimi əsaslandırır. Dəməşqin açıqlamasına görə, dövlət suverenliyinə və ictimai sabitliyə hər hansı təhdid qətiyyətlə aradan qaldırılacaq.
Əldə olunan görüntülər və internetə yayılan videolar bölgəyə tank və zirehli texnikanın, artilleriya batareyalarının gətirildiyini, xüsusi təyinatlıların isə kəndlərdə mövqelər tutduğunu təsdiqləyir. Suriya ordusu druz silahlı mövqelərinə qarşı lokal əməliyyatlar apararaq bir sıra strateji əraziləri nəzarət altına alıb.
Əməliyyatlar nəticəsində onlarla druz silahlısının əsir götürüldüyü bildirilir. Kadrlarda əlləri bağlanmış, xüsusi təyinatlıların müşayiəti ilə aparılan döyüşçülər aydın görünür.
İlkin məlumatlara görə, son toqquşmalarda onlarla insan həlak olub, yüzlərlə yaralanıb.
Hökumətin apardığı antiterror əməliyyatında isə çoxsaylı ölümlər barədə məlumat var. Bölgədəki mülki əhali üçün humanitar vəziyyət daha da ağırlaşıb. Bəzi kəndlərdən əhalinin çıxmağa başladığı barədə xəbərlər var.
Analitiklər xəbərdarlıq edirlər ki, Əs-Suveida əsasən druz icmasının yaşadığı xüsusi dini-sosial regiondur və burada genişmiqyaslı anti-terror əməliyyatları Suriyanın daxilində yeni vətəndaş müharibəsi ocağına çevrilə bilər.
Beləliklə, hazırda Suriya ordusu ölkənin ərazi bütövlüyünü qorumaq və başıpozuq silahlı qruplaşmaları sıradan çıxarmaq üçün Əs-Suveidada sərt addımlar atır. Əməliyyatlar davam edir və prosesin necə nəticələnəcəyi yaxın günlərdə daha dəqiq məlum olacaq.
Musavat.com
