"Trampın Ukrayna planı təkcə masa arxasında deyil, həm də hərbi bazalarda formalaşır..."
ABŞ prezidenti Donald Tramp Rusiya-Ukrayna müharibəsinin dayandırılması üçün "aqressiv" və qətiyyətli şəkildə hərəkət edir.
Moderator.az xəbər verir ki, bu barədə ABŞ Dövlət Departamentinin mətbuat katibi Temmi Bryus bəyan edib. Məlumatı "gazeta.ua" nəşri yayıb.
Onun sözlərinə görə, Tramp hazırkı vəziyyətdən narazıdır və bu qanlı toqquşmalara son qoymaq istəyir. Onun diplomatik təşəbbüsləri isə yalnız bəyanatlarla məhdudlaşmır. "Prezident Tramp bu məsələni olduqca sərt şəkildə izləyir və onun müharibənin bitməsi ilə bağlı baxışları getdikcə daha açıq və konkret ifadə olunur", - Bryus bildirib. Onun sözlərinə görə, Tramp NATO ilə razılaşmalara sadiq qalaraq Ukraynanın müdafiə qabiliyyətini gücləndirməyə çalışır. Bu isə ABŞ-ın Ukraynaya silah tədarükünü sürətləndirməsi ilə müşayiət olunur.
50 günlük möhlət və enerji bazarına təzyiq siqnalı
İyulun 14-də Tramp Rusiyaya 50 günlük müddət verib. Bu zaman kəsiyində ya sülh razılaşmasına gəlməli, ya da müharibəni dayandırmalıdır. Əks halda ABŞ Rusiyaya və ondan neft alan ölkələrə 100 faiz tarif tətbiq edəcəyini bildirib. Beləliklə, Tramp iqtisadi rıçaqlarla Kremlin üzərinə təzyiq qurmağa çalışır. Ağ Ev nümayəndələri isə əlavə edib ki, bu 50 gün tamamlandıqdan sonra nə baş verəcəyinə dair planlar artıq masadadır.
"Patriot" raketləri: Tramp silah tədarükünü sürətləndirir
Tramp administrasiyası təkcə diplomatiya ilə kifayətlənmir, eyni zamanda ABŞ-ın öz ehtiyatlarından Ukraynaya "Patriot" zenit-raket sistemlərinin verilməsi məsələsini gündəmə gətirib. ABŞ-ın NATO-dakı xüsusi nümayəndəsi Metyu Uitakerin sözlərinə görə, Ukraynanın döyüş meydanında və şəhərlərinin müdafiəsində bu sistemlərə təcili ehtiyacı var. "Biz heç zaman ABŞ-ı strateji cəhətdən zəif duruma salmayacağıq. Amma eyni zamanda Ukraynanın bu silahlara ehtiyacını da başa düşürük", - Uitaker bildirib.
Hələlik raketlərin dəqiq nə zaman çatdırılacağı bəlli deyil. Tramp 17 "Patriot" sisteminin yola salındığını desə də, ekspertlər bunun iki batareya, yəni 17 buraxılış qurğusu olduğunu düşünür. Hətta Tramp onların artıq Almaniyadan yola düşdüyünü iddia etsə də, Berlin bu məlumatı təkzib edib. Almaniya Müdafiə Nazirliyi belə bir təhvil-təslimdən xəbərsiz olduğunu bildirib. Buna baxmayaraq, Almaniya kansleri Fridrix Mers Ukraynanın yaxın həftələrdə "Patriot" sistemlərini alacağını açıqlayıb.
Tramp həm diplomatik, həm hərbi təzyiqlərlə irəliləyir
Trampın Ukrayna planı təkcə masa arxasında deyil, həm də hərbi bazalarda formalaşır. O, bir tərəfdən Rusiya liderinə konkret ultimatum verir, digər tərəfdən isə Ukraynanın silahlanmasına təkan verir. Bu, onun seçkiqabağı dövrdə həm daxili, həm də beynəlxalq auditoriyaya "sülhə məcburetmə" lideri obrazını təqdim etməsinə xidmət edir. Müharibənin gələcəyi isə Kremlin cavabından və NATO ölkələrinin həmrəyliyindən asılı olacaq.
