ain.az, News24 portalına istinadən məlumat yayır.
Azərbaycan Mərkəzi Bankı (AMB) bu həftə, yəni iyulun 23-də növbəti dəfə uçot dərəcəsini açıqlayacaq. Mərkəzi Bank iyunun 11-də açıqladığı qərarda inflyasiyanın xarici mühitində qeyri-müəyyənliklərin azalmasının növbəti iclasda uçot dərəcəsinin azaldılması üçün zəmin yarada biləcəyini vurğulamışdı.
Analitiklər qeyd edirlər ki, bu, yumşalma istiqamətində açıq siqnaldır, lakin şərt kimi qeyri-müəyyənliyin azalmasını göstərilir. Bu isə uçot dərəcəsinin endiriləcəyinə tam zəmanət vermir. AMB bu iclasda uçot dərəcəsini dəyişməz saxlayacaq, lakin mətbuat konfransında daha açıq yumşalma siqnalları verilə bilər. Əgər avqust-sentyabr aylarında inflyasiyada azalma davam edərsə, oktyabrda ilk faiz endirimi baş tuta bilər.
Mövzu ilə bağlı Yenisabah.az-a danışan iqtisadçı-ekspert Natiq Cəfərli bildirib ki, Mərkəzi Bank belə kəskin amplitudalarda azalmaya getməyəcək:
“Məncə Azərbaycan Mərkəzi Bankı uçot dərəcəsinin azaldılması ilə bağlı qərar verməyə çox yaxındır. Amma belə kəskin amplitudalarda azalmaya getməyəcək. Ən yüksək ehtimallı gözlənti uçot dərəcəsinin 0.25 faiz azaldılması ola bilər. İlin sonuna qədər ən azı 2 belə qərarın olması gözlənilir. Azərbaycan Mərkəzi Bankı daha çox ABŞ Federal Ehtiyat Sisteminin (FED) atdığı addımları diqqətlə izləyir. Federal Ehtiyat Sistemi də ilin sonuna qədər 0.25 faiz bəndi ilə faizləri 2 dəfə azalda bilər. Buna paralel olaraq, Azərbaycan Mərkəzi Bankının belə bir addım atması gözlənilir”.
Xatırladaq ki, Mərkəzi Bank 2024-cü ilin may ayından etibarən uçot faiz dərəcəsini sabit saxlayıb. Uçot dərəcəsi 7.25%, faiz dəhlizinin aşağı həddi 6.25%, faiz dəhlizinin yuxarı həddi isə 8.25% səviyyəsində dəyişməz saxlanılıb.
Sonrakı hadisələr barədə daha çox məlumat almaq üçün ain.az saytını izləyin.
