Gürcüstanın paytaxtı Tbilisidə Olimpiya İdman Sarayının yaxınlığında Rusiya qılıncoynatma komandasının dünya çempionatında iştirakı ilə bağlı etiraz aksiyaları keçirilib.
Publika.az xəbər verir ki, bu barədə Gürcüstan mətbuatı məlumat yayıb.
Etirazçılar “Onlar Tbilisidə qılınc çəkirlər – Ukraynada öldürürlər”, “Siyasətdən kənar idman? Bunu müharibədə ölənlərə deyin”, “Rusiyanın ağ bayrağı qılıncoynatma yolunda deyil, döyüş meydanında olmalıdır” və “Rus donuzları, burada sizə görə sevinmirlər! Bu gün və sabah atəşfəşanlıq olacaq” sözləri yazılmış plakatlarla küçələrə çıxıblar.
Sonuncu şüar iyulun 27-də səhər saat 4 radələrində Rusiya idmançılarının qaldığı otelin pəncərələri altında baş vermiş atəşfəşanlıq insident ilə bağlıdır. Fəallar Rusiya bayrağını da yandırıblar.
