- Gecə Modu
- Ana səhifə
- Statistika
- Mənbələr
- Reytinq
- Hava
- Valyuta
Şamaxıda 34 yaşlı oğlan ögey anasını qanına boyadı, həbs edildi — TƏFƏRRÜAT
Demokrat.az-ın əldə etdiyi xəbərə görə, hadisə Şamaxı rayonu, Şəhriyar qəsəbəsində baş verib. Qəsəbə sakini, 1991-ci il təvəllüdlü Elşən ögey anası Zərinə aralarında şəxsi münasibətlər zəminində mübahisə baş verib.
Mübahisə zamanı o, zərərçəkmiş şəxsin onu təhqir etməsindən qəzəblənib. Cibindən çıxartdığı bıçaqla əvvəlcə ögey anasının sol döş nahiyəsindən qəsdən bir dəfə zərbə vurub. Həmin vaxt zərərçəkmiş şəxs özünü müdafiə məqsədilə bıçağı əli ilə tutaraq saxladığı üçün bıçağın onun barmağını kəsib.
Daha sonra oğul həmin bıçaqla zərərçəkmiş şəxsin qarın və kürək nahiyələrindən qəsdən daha iki dəfə zərbə vurub.
Hadisəni törədən Elşənin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
Cinayət işi üzrə izahat verən təqsirləndirilən şəxs ona elan olunmuş ittiham üzrə özünü qismən təqsirli bilib.
O, ifadəsində göstərib ki, 2013-cü ildə ailə həyatı qurub və bir müddət Quşçu kəndində atası Alşan ilə birlikdə yaşadıqdan sonra onlardan ayrılıb, başqa evə köçüb:
“Atam Şəhriyar qəsəbəsində özü üçün ev tikdirdi. Mən də atamın evinin yanında özüm üçün ev tikdirərək, orada yaşamağa başladım. Bir müddət sonra mənim atam ilə münasibətlərim pozuldu. Hadisə günü, saat 9 radələrində atam Alşan və ögey anam Zərinənin yaşadığı evin qarşısında sonuncu ilə aramızda mübahisə baş verdi. Mübahisə zamanı ilk öncə Zərinə məni təhqir etdi.
Mən də cavabımda Zərinəni təhqir etdim. Lakin, Zərinəyə bıçaqla hər hansı bir xəsarət yetirməmişəm. Zərərçəkmiş şəxsdən 8000 manat istəməmişəm və hər hansısa bir hədə-qorxu gəlməmişəm.
Mən avtomobil almaq məqsədi ilə özüm üçün bir qədər pul yığmışam və Zərinə ilə münasibətlərim yaxşı olduğundan ondan borc pul istəmişəm. Zərinə 3000 manata qədər borc pul verə biləcəyini dedi. Lakin söylədim ki, 3000 manat azdır və bir qədər çox borc pul versin. Mən özüm bir qədər pul yığmışdım. Lakin 5000 manat pulum çatmayıb”.
İş üzrə zərərçəkmiş Zərinənin sözlərinə görə, 2008-ci ildə Alşan ilə qeyri-rəsmi ailə həyatı qurub və həmin evlilikdən 3 övladı var:
“Təqsirləndirilən şəxs mənim ögey oğlumdur. Elşən ailə həyatı qurduqdan sonra, 2013-cü ildən bizdən ayrı yaşamağa başladı. 2015-ci ildən isə Elşən yaşadığımız Şəhriyar qəsəbəsində olan evin yaxınlığında özü üçün ev tikdirdi və ailəsi ilə birlikdə orada yaşamağa başladı”.
Zərərçəkmiş qeyd edib ki, hadisə günü, saat 9 radələrində yaşadığı evdən küçəyə çıxıb və toyuqlarını evə gətirmək istəyib:
“Bu zaman Elşənin qaçaraq, mənə yaxınlaşdığını gördüm. Həmin vaxt aramızda yaranmış mübahisə zamanı Elşənin həyat yoldaşının və uşaqlarının ünvanına nalayiq ifadələr işlətdim. Elşən cibindən knopka ilə açılıb-bağlanan bıçağı çıxardaraq, üzərimə hücum çəkdi və ilk əvvəl ürəyimin üstündən vurmaq istədikdə sağ əlim ilə bıçağı tutdum və saxladım ki, mənə xəsarət yetirə bilməsin. Lakin, həmin vaxt Elşən bıçaqla sol döş nahiyəmdən xəsarət yetirdi və bıçağı tutaraq saxladığım üçün , barmaqlarım kəsildi. Elşənə müqavimət göstərdiyim üçün yenidən mənə xəsarət yetirmək məqsədi ilə əlindəki bıçaqla qarnımın sol nahiyəsindən vurdu.
Mən qaçmaq istədikdə, Elşən sol kürək nahiyəmdən vurmaq istəsə də, bıçaq kürək nahiyəmə batmadı. Amma kürəyimdən xəsarət almışam və qışqıraraq qonşuları köməyə çağırdım. Yerdən götürdüyüm daşı Elşənə atmışam. Elşən qışqırdığımı görərək dərhal həmin yerdən uzaqlaşdı. Bundan sonra evə daxil oldum və həyətdə oturan zaman səhhətimin pisləşdiyini gördüm. Oğlum Ədalətə söylədim ki, təcili tibbi yardıma zəng edərək kömək çağırsın. Həkimlər gəldikdən sonra məni Şamaxı Rayon Diaqnostika Mərkəzinə apardılar və orada mənə tibbi yardım göstərildi”.
Bu cinayət işinə Şamaxı Rayon Məhkəməsində baxılıb. Məhkəmənin hökmü ilə Elşən 11 ay 26 gün müddətinə azadlığın məhdudlaşdırılması cəzası alıb.
Təqsirləndirilən şəxsin üzərinə yaşayış yerini saat 22:00-dan 07:00-dək tərk etməmək, elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün ona xidmət etməsi tapşırılıb.
Bundan başqa, onun cəza çəkdiyi müddətdə Şamaxı rayonunun ərazisini tərk etməsi qadağan olunub. Müvafiq məhkəmə qərarı olmadan yaşayış yerini dəyişdirməmək, habelə cəzanın icrasına nəzarət edən orqanı iş və ya təhsil yerinin dəyişdirilməsi barədə əvvəlcədən məlumatlandırmaq vəzifələrinin yerinə yetirilməsi tapşırılıb.
Hökmdən narazı qalan zərərçəkmiş apellyasiya şikayəti verib.
Şikayətçi ögey oğlunun barəsində olan hökmün ləğv edilməsini, onun azadlıqdan məhrum edilməsini istəyib.
Şikayətçi qeyd edib ki, məhkəmə təqsirləndirilən şəxsə ittiham hökmü çıxarmasına baxmayaraq cəzanı daha az təyin edib.
Onun sözlərinə görə, istintaq orqanı ona dəyən dörd bıçaq zərbəsini düzgün qiymətləndirməyib.
Şikayətçinin sözlərinə görə, təqsirləndirilən şəxsə Cinayət Məcəlləsinin 128-ci maddəsi ilə cinayət işi qaldırıb:
“Halbuki, həmin əməl ictimai yerdə törədilib və Cinayət Məcəlləsinin 221-ci maddəsinin 3-cü bəndi ilə təqsirli bilinməli idi. Çünki silah qismində bıçaqdan istifadə olunub. Həmin işin təkrar araşdırılması üçün istintaq orqanına qaytarılması üçün Şamaxı rayon Məhkəməsinə vəsatətlə müraciət etməyimizə baxmayaraq məhkəmə bu vəsatətlərin hər hansı birini təmin etmədi. Cinayət Məcəlləsinin 128-ci maddəsində cəzanın yuxarı həddinin 1 ilədək azadlıqdan məhrum etmə cəzası var. Məhkəmə barışığın və dəymiş olan ziyanın ödənilməməsi hallarına baxmayaraq cəzanın azadlıqdan məhrum etmə cəzası ilə cəzalandırmadı”.
Bu şikayətə Sumqayıt Apellyasiya Məhkəməsində baxılıb. Hakim Ruhiyyə Əsgərovanın sədrliyi ilə keçirilən prosesdə qərar elan edilib.
Qərara görə, zərərçəkmiş şəxsin apellyasiya şikayəti təmin edilib və birinci instansiya məhkəməsinin hökmü dəyişdirilib.
Elşən 5 ay 28 gün müddətinə azadlıqdan məhrum edilib. Onun barəsində seçilmiş polisin nəzarəti altına vermə qətimkan tədbiri həbs qətimkan tədbiri ilə əvəz edilib.
O, məhkəmə iclas zalından həbs edilib.
Fariz Məlikli
Demokrat.az
