Britaniyanın neft və qaz şirkəti BP (British Petroleum) avqustun 4-də Braziliya sahillərində şirkətin son 25 ildə ən böyük neft və qaz yatağının kəşf edildiyini açıqlayıb.
AzPost bildirir ki, “Bumeranq” adı verilən kəşf ölkənin cənub-şərqində, Rio-de-Janeyrodan 404 kilometr aralıda yerləşən Santos hövzəsində edilib.
Yataq Atlantik okeanında duz qatının altında yerləşir. DW xəbər verir ki, BP aşkar edildiyi ərazidə faydalı qazıntıların çıxarılması hüququnu 2022-ci ilin dekabrında hərracda alıb. Şirkət 5855 metr dərinliyi olan quyu qazıb və ümumi sahəsi 300 kvadrat kilometrdən çox olan üstü açılmış faydalı qazıntı ehtiyatları aşkar edib.
Qeyd olunur ki, karbon qazının konsentrasiyasının artması istehsalı çətinləşdirə və emal xərclərini artıra bilər. BP hazırda yatağın potensialını dəqiq müəyyən etməyə imkan verəcək əlavə laboratoriya tədqiqatları aparır.
“Bumeranq” BP-nin 2025-ci ildə kəşf etdiyi onuncu neft-qaz yatağıdır. Bundan əvvəl şirkətin mütəxəssisləri təkcə Braziliyada deyil, Trinidad, Misir, Meksika körfəzi, Liviya, Namibiya və Anqolada da yataqlar aşkar ediblər.
“Bumeranq”a qədər Britaniya şirkətinin 25 il ərzində ən böyük yatağı Azərbaycanda 1999-cu ildə kəşf edilmiş “Şahdəniz” yatağı olub. Azərbaycan mətbuatının məlumatına görə, onun sahəsi 140 kvadrat kilometrdən çoxdur. BP yatağın operatorudur, lakin orada hasilatı, məsələn, Rusiyanın özəl şirkəti “Lukoyl”, həmçinin Azərbaycan və Türkiyənin dövlət şirkətləri – SOCAR və TPAO həyata keçirir.
