"İsrail baş naziri beynəlxalq ictimaiyyətə sərt mesaj göndərib..."
Avqustun 10-da İsrailin baş naziri Binyamin Netanyahu Qüdsdə xarici KİV nümayəndələrinin iştirakı ilə mətbuat konfransı keçirərək, hazırkı Qəzza müharibəsinin yekunlaşması üçün öz "beş prinsip"ini açıqlayıb
Moderator.az xəbər verir ki, bu barədə "dw.com" nəşri məlumat yayıb.
Məlumatda deyilir ki, baş nazir günün sonunda İsrail ictimaiyyətinə də ayrıca müraciət edəcəyini bildirib.
Netanyahu çıxışına "yalanları dağıdıb, həqiqəti üzə çıxarmaq" iddiası ilə başlayıb və müharibənin bitməsi üçün aşağıdakı şərtləri sadalayıb:
- HƏMAS-ın silahsızlaşdırılması
- Qəzzanın tam silahsızlaşdırılması
- İsrailin təhlükəsizlik nəzarəti və bufer zonanın yaradılması
- Terroru təşviq etməyən mülki hökumət qurulması
- Bütün girovların azad edilməsi.
Baş nazir vurğulayıb ki, əgər HƏMAS silahı yerə qoyub girovları azad etsə, müharibə bu gün də bitə bilər. Onun sözlərinə görə, İsrail müharibə istəmir, amma təhlükəsizliyini təmin etmək məcburiyyətindədir.
Qəzzada mövcud vəziyyət
Netanyahu bildirib ki, hazırda Qəzza bölgəsinin təxminən 75 faizi İsrail ordusunun nəzarətindədir. HƏMAS-ın iki əsas dayağı - Qəzza şəhəri və mərkəzi bölgədəki düşərgələr hələ də müqavimət göstərir.
Qəzzada aclıqla bağlı beynəlxalq ittihamlara cavab verən baş nazir deyib ki, müharibə başlayandan bəri təxminən 2 milyon ton humanitar yardımın gətirilməsinə icazə verilib. Onun sözlərinə görə, problem odur ki, HƏMAS yük maşınlarını qarət edir, BMT isə aylarla minlərlə ərzaq maşınını paylamaqdan imtina edir.
Netanyahu İsrailin bu vəziyyəti üç yolla həll etməyə çalışdığını vurğulayıb: təhlükəsiz yardım dəhlizləri yaratmaq, yerli qüvvələrin idarə etdiyi paylama məntəqələrinin sayını artırmaq və havadan yardım çatdırmaq.
Beynəlxalq təzyiq və "orta əsrlər" bənzətməsi
Netanyahu İsrailə qarşı aparılan beynəlxalq kampaniyanı "orta əsrlərdəki qan böhtanları" ilə müqayisə edib. O, aclıq çəkən kimi təqdim olunan üç uşağın əslində ağır genetik xəstəliklərdən əziyyət çəkdiyini, bəzilərinin İsraildə və xaricdə müalicə olunduğunu söyləyib və bunu "faktların qəsdən təhrif edilməsi" adlandırıb.
İnfrastruktur dağıntılarının səbəbi
Baş nazir qeyd edib ki, Qəzzada genişmiqyaslı dağıntılar İsrailin məqsədli siyasətindən deyil, HƏMAS-ın hər binaya və küçə başına yerləşdirdiyi partlayıcı tələlərdən qaynaqlanır. Onun sözlərinə görə, mülki əhali təxliyə edilir, lakin tələləri zərərsizləşdirmək üçün xüsusi vasitələrdən istifadə olunmalı olur ki, bu da dağıntıların əsas səbəbidir.
Fələstin dövlətçiliyi məsələsi
Netanyahu son aylarda artan "Fələstin dövlətinin tanınması" dalğasını "terrora verilən mükafat" adlandıraraq, bunun böyük bir səhv olduğunu deyib. O, xatırladıb ki, tarix boyu Fələstin tərəfinə bir neçə dəfə dövlət qurmaq təklifi verilib, amma hər dəfə rədd edilib.
Onun fikrincə, HƏMAS və Ramallahdakı Fələstin Administrasiyası öz məqsədlərində - İsraili aradan qaldırmaqda eynidir, fərq isə yalnız metodlarda gizlənir. HƏMAS bunu hərbi yolla etməyə, FƏTH isə beynəlxalq arenada və mərhələli ərazi əldə etmə yolu ilə çalışır. Netanyahu sonda bəyan edib ki, əgər fələstinlilər yəhudilərlə yanaşı yaşamaq istəyirlərsə, İsraili məhv etmək ideyasından imtina etməlidir.
