Böyük Britaniyada 200-dən çox qaçqın təşkilatı, xeyriyyə fondu və həmkarlar ittifaqı ölkənin siyasi liderlərinə ünvanladıqları açıq məktubda antimiqrant etirazlarını alovlandıran zərərli və gizli nifrət axınlarının dayandırılması üçün təcili tədbirlər görülməsini tələb ediblər.
“İki sahil” “Guardian”a istinadla xəbər verir ki, “Mülkiyyət Sahibi Qaçqınlarla Birlikdə” kampaniya koalisiyası tərəfindən hazırlanmış məktub “Amnesty International UK”, “City of Sanctuary UK”, “Doctors of the World” və bir çox önəmli qurumlar tərəfindən imzalanıb. Sənəd son həftələr ölkə üzrə sığınacaq axtaranların yerləşdirildiyi otellərin qarşısında keçirilən etiraz aksiyalarına cavab olaraq hazırlanıb. Bu aksiyalara bəzən antiirqçiliyi müdafiə edən qruplar da qarşılıq verib. Etirazlar, o cümlədən Reform UK partiyasının lideri Naycel Farac və Mühafizəkarlar Partiyasından Robert Cenrik kimi siyasətçilərin miqrasiya ilə bağlı yaydığı təxribat xarakterli bəyanatlar fonunda baş verib.
Keçən həftə Robert Cenrik kütləvi miqrasiyanın qadın və qızların təhlükəsizliyinə təhdid yaratdığını iddia edərək narazılıq doğurub. O, Londonda ötən il törədilən seksual zorakılıq hallarının 40 faizinin xarici vətəndaşlar tərəfindən edildiyi iddiasını təkrarlayıb, baxmayaraq ki, bu və digər bəyanatlar son günlərdə mübahisə və təkzib edilib.
Açıq məktubda deyilir: “Ölkə üzrə anti-qaçqın etirazları narahatedici mənzərədir və ötən yay baş verən iğtişaşların təkrarlanması ehtimalını düşündürür. Bu etirazların arxasında dayanan zərərli və gizli irqçilik, nifrət ritorikası mövcud sistemin uğursuzluğunun bariz sübutudur. Keçmişin parçalayacı siyasətinə, irqçi ritorikasına və demonizəedici dilinə son qoymaq sizin məsuliyyətinizdir. Yalnız bu halda nifrət yerinə həmrəylik, parçalanma yerinə birlik gətirmək mümkün olacaq”.
