BAKI, 14 avqust. TELEQRAF
"Sea Breeze Resort" yaşayış və istirahət kompleksində Fövqəladə Hallar Nazirliyinin (FHN) təşkilatçılığı ilə təlimin keçirilməsində əsas məqsəd kompleksin aidiyyəti heyətinin fövqəladə hallar zamanı davanış mövzusunda maarifləndirilməsindən ibarətdir.
Teleqraf xəbər verir ki, bunu FHN-in Dövlət Yanğın Nəzarəti Xidmətinin şöbə rəisi, daxili xidmət kapitanı Əlibala Əlizadə deyib.
O bildirib ki, iki hissədən ibarət təlimdə həm nəzəri, həm də praktiki olmaqla aidiyyəti heyətə müvafiq biliklər aşılanıb:
"Təlimə FHN-nin Dövlət Yanğından Mühafizə, Dövlət Yanğın Nəzarət, Xüsusi Riskli Xilasetmə, Kiçikhəcmli Gəmilərə Nəzarət və Sularda Xilasetmə Dövlət Xidmətinin canlı qüvvəsi və texnikası cəlb olunub. Təlim zamanı qarşıya qoyulan tapşırıqlar uğurla yerinə yetirilərək baş vermiş yanğın şərti söndürülüb, ərazidə köməksiz vəziyyətdə qalan vətəndaşlar təxliyə edilib, suda boğulma təhlükəsilə üzləşmiş vətəndaş xilas edilib, partlama təhlükəsi olan maddələr tapılaraq aidiyyəti üzrə zərərsizləşdirilib".
