Bakupost saytından alınan məlumatlara görə, ain.az xəbər verir.
Fərhad Pərvizi verdiyi son müsahibədə bir daha təsdiqlədi ki, onun mövqeyi təsadüfi və fərdi emosiyaların ifadəsi deyil, sistemli şəkildə qadınlara qarşı nifrəti təşviq edən, onları cəmiyyətdən kənarlaşdırmağa yönəlmiş bir ideoloji xəttdir. Onun ritorikasını təhlil etdikdə, üç əsas istiqamət aydın görünür:
Tunay Əliyeva,
Keçmiş teleaparıcı, aktrisa
1. Yaş üzərindən ayrı-seçkilik. Pərvizi qadının “dəyərini” yalnız 18–25 yaş aralığı ilə məhdudlaşdırır, bu yaşdan sonra qadınların “maraqsız” olduğunu iddia edir. Bu, həm açıq bioloji determinizmdir, həm də qadının kimliyini yalnız fiziki görünüşlə ölçən təhqiramiz yanaşmadır.
2. İşləyən qadınlara qarşı nifrət. Onun iddiasına görə, “xəyanətlərin çoxu iş mühitində baş verir.” Bu cümlə sadəcə bir fikir deyil – birbaşa sosial manipulyasiya texnikasıdır. Dolayısı ilə kişi auditoriyasına mesaj ötürülür: “Qadın işləyirsə, xəyanət edə bilər.” Bu isə qadınların əmək bazarından kənarlaşdırılması, iqtisadi asılılığının dərinləşdirilməsi deməkdir.
3. Geyim üzərindən damğalama. Pərvizi “açıq-saçıq geyinən qadın fahişə kimi geyinir” fikrini irəli sürür. Bu, fərdi seçimə qarşı zorakı münasibət olmaqla yanaşı, qadınları zorla “qapatmağa” yönəlmiş təhlükəli çağırışdır.Bu üç istiqamət birləşəndə ortaya açıq strategiya çıxır: qadının sosial iştirakını məhdudlaşdırmaq, onu evə qapamaq və kişiyə iqtisadi-sosial asılı vəziyyətə salmaq.
Müsahibənin ən diqqətçəkən tərəfi Pərvizinin müdafiə strategiyası oldu. O, hər iki dəqiqədən bir eyni bəhanəni təkrar edir: “Məni səhv anladılar, sözlərimi montaj etdilər.” Halbuki faktlar göz önündədir. Onlarla video və çıxışda qadınlara qarşı nifrət nitqləri açıq şəkildə sənədləşdirilib. Buna baxmayaraq, Pərvizi həyasızcasına özünü “yanlış anlaşılan qurban” kimi təqdim edir.Daha da qorxuncu odur ki, qadınları alçaldan, aşağılamağı normal sayan Pərvizi, qorxaqcasına öz anasının və qızlarının adını çəkərək rəhm və simpatiya qazanmağa çalışır. Bu, klassik manipulyasiya üsuludur: həm nifrət nitqi yay, həm də ailənin arxasında gizlənərək günahı pərdələ.
Müsahibədə ən sensasion anlardan biri Pərvizinin öz nifrət dolu mövqeyini Prezident İlham Əliyevdən “ilhamlandığını” iddia etməsi idi. Burada diqqətçəkən məqam ondan ibarətdir ki, o, sadəcə şəxsi fikrini ifadə etmir, əksinə, bu ritorikanı Prezident İlham Əliyevin adına bağlamaqla onu legitimləşdirməyə çalışır.Onun cavablarından aydın görünürdü ki, Pərvizi açıq-aşkar meydan oxuyur: “Bu sözlər mənim deyil, mən prezidentdən ilhamlanıram, prezidentlə eyni fikirdəyəm.”
Bu, çox təhlükəli manipulyasiyadır. Çünki belə bir gedişlə o, həm öz nifrət nitqlərinə əlavə güc qazandırır, həm də onları cəmiyyət qarşısında toxunulmaz etmək istəyir.
Əgər jurnalist həmin an peşəkar olsaydı, dərhal əsaslı suallar verməliydi:
Prezident həqiqətən də qadınların işləməsinə qarşıdırmı?
Prezident də açıq geyinən qadınları “fahişə” hesab edirmi?
Prezident də qadınlara küçədə sataşmamağı “maskulinliyin itməsi” kimi görürmü?
Bu suallar verilmədi. Nəticədə, Pərvizi faktiki olaraq dövlət başçısının adını “qalxan” kimi istifadə etdi və nifrət ritorikasını reklam etməyə davam etdi. Bu isə artıq sadəcə fərdi bir açıqlama deyil, ictimai sabitlik üçün təhlükəli siqnaldır. Asan işdir…
Cəmiyyət üçün nəticə
Fərhad Pərvizinin mövqeyi təsadüfi sözlər deyil, cəmiyyəti sistemli şəkildə geriyə aparmaq cəhdidir. Onun ritorikası bəzi dairələr üçün cazibədar görünə bilər, amma əslində bu, Azərbaycanı sosial inkişafdan geri saxlayan, qadınların hüquq və azadlıqlarını tapdalayan təhlükəli bir ideoloji xəttdir. Əslində, bu yanaşma qadınlara qarşı olduğu qədər kişilərə qarşı da düşmən mövqeyidir. Çünki qadın işləmədikdə, bütün ailə yükü kişinin üzərinə düşür. Bu isə müasir iqtisadi reallıqda bir nəfərin çiyinləyə biləcəyi yük deyil. Son nəticədə kişilər ya depressiyaya düşür, ya alkoqolizmə meyillənir, ya da ailə institutunun dağılması ilə üz-üzə qalırlar.
Deməli, Pərvizinin ritorikası təkcə qadınları yox, kişiləri də məhvə aparır. O, kişi-qadın münasibətlərini qarşı-qarşıya qoyur, iş yerlərində gərginlik yaradır, ailələrdə etimadı sarsıdır. Bu isə artıq sadəcə fərdi fikir yox, cəmiyyət üçün açıq təhlükədir.Nəticə etibarilə, Fərhad Pərvizi yalnız qadınların deyil, kişilərin də, ümumilikdə isə Azərbaycan xalqının düşmənidir. Onun təbliğ etdiyi mövqelər sabitliyi pozur, inkişafı ləngidir və insanları qarşıdurmaya sürükləyir…
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
