Neft qiymətləri bazar ertəsi ABŞ-ın Rusiyaya əlavə təzyiqlər göstərməməsi səbəbindən düşüb.
Marja.az-ın məlumatına görə, qiymət enişinə səbəb, Cümə günü iki ölkə liderinin görüşündən sonra Vaşinqtonun Moskvanın neft ixracını məhdudlaşdıracaq yeni addımlar atmaqdan yayınması olub. Bu da Rusiyanı Ukrayna müharibəsini dayandırmağa məcbur etmək cəhdlərinin zəiflədiyini göstərib.
Brent markalı neftin oktyabr fyuçersləri 1,5 faiz ucuzlaşaraq 65,49 dollara, WTI markalı ABŞ xam neftinin fyuçersləri isə 1,3 faiz ucuzlaşaraq 62,62 dollara düşüb (Bakı vaxtı ilə saat 08:30-a olan məlumat).
ABŞ Prezidenti Donald Tramp ötən Cümə Alyaskada Rusiya Prezidenti Vladimir Putinlə görüşərək, atəşkəsdən əvvəl sülh sazişi istiqamətində Moskva ilə daha uzlaşmaya meylli mövqe nümayiş etdirib.
Tramp bazar ertəsi Ukrayna Prezidenti Volodimir Zelenski və Avropa liderləri ilə sürətli barış razılaşmasına nail olmağı planlaşdırır.
Dövlət başçısı Cümə günü bildirib ki, Rusiya neftini idxal edən Çin kimi ölkələrə qarşı dərhal əlavə tariflər və sanksiyalar tətbiq etmək fikrində deyil. Lakin o, “iki-üç həftə ərzində” bu addımın qaçılmaz ola biləcəyini istisna etməyib. Bu açıqlamalar, Rusiyanın neft ixracında mümkün kəsinti ilə bağlı bazarlarda yaranmış narahatlıqları yumşaldıb.
Dünyanın ən böyük neft idxalçısı olan Çin, həm də Rusiya neftinin əsas alıcısıdır. Onun ardınca Hindistan gəlir.
