Ajans.az BBC-ə istinadən xəbər verir ki,söhbət Avropa alt növünə aid böyük mis kəpənəyindən gedir. O, Dadlidəki Bumble Hole Təbiət Qoruğu və Rowley Regisdəki Warrens Hall Təbiət Qoruğu ərazisində görüldü. Bu hadisə yüzlərlə təbiət həvəskarının bölgəyə axışmasına səbəb olub. Xatırladaq ki, kəpənəyin İngiltərə alt növü yaşayış yerlərinin məhv olması səbəbindən hələ XIX əsrin ortalarında yoxa çıxmışdı. “Bu, bir az detektiv hekayəyə bənzəyir. Kimin buraxdığını heç kim bilmir”, – deyə Kəpənəklərin Mühafizəsi Təşkilatının West Midlands bölməsindən Mayk Uilyams bildirib. O, həmçinin əlavə edib ki, internet vasitəsilə hələ də kəpənəyin yumurta və tırtıllarını əldə etmək mümkündür. Bumble Hole Conservation Group-un sədri Brenda Myers isə bildirib:
“Bu, sadəcə olaraq çılğınlıq idi. İnsanların əksəriyyəti ehtiyatlı davransa da, bəzi ziyarətçilər təbiət qoruğuna ziyan vurdu”. Mütəxəssislər kəpənəklərin bölgədə qalacağına inanmır. Çünki onların əsas yem bitkiləri burada çox azdır və yaşayış sahəsi kifayət etmir. Bundan başqa, Britaniya qışlarının sərtliyi onların sağ qalmasına mane ola bilər. Mayk Uilyams xəbərdarlıq edib:
“Belə buraxılışlar nadir hallarda uğurlu olur. İnsanlar bu işi özbaşına görməməlidirlər”. Mütəxəssislərin fikrincə, kəpənəkləri qorumaq üçün insanlar vəhşi təbiət təşkilatları ilə əməkdaşlıq etməli, bağlarında tozlandırıcıya uyğun bitkilər əkərək yerli növlərin yaşamasına dəstək olmalıdırlar. Uilyams nümunə kimi Böyük Britaniyada vaxtilə uğurla həyata keçirilmiş böyük mavi kəpənəyin və ağac ağlarının reintroduksiya proqramlarını göstərib.