Qərb dövlətləri NATO-nun 5-ci maddəsinə bənzər mexanizmi müzakirə edir...
Poliqon xəbər verir ki, Qərb ölkələri Ukraynaya verilə biləcək təhlükəsizlik zəmanətlərini müzakirə etməyə davam edir. Bloomberg-in məlumatına görə, bu zəmanətlər hələ konkret plana çevrilməsə də, gündəmdə olan əsas variantlardan biri Ukraynaya “hava örtüyü” təmin edilməsidir.
Məsələ ilə bağlı mənbələr bildiriblər ki, NATO Nizamnaməsinin 5-ci maddəsinə bənzər zəmanətlərin Ukrayna üçün nəzərdə tutulması variantı da müzakirə olunub. Həmin maddə alyans üzvlərinin hər hansı üzvünə hücum olduğu təqdirdə kollektiv müdafiə öhdəliyini nəzərdə tutur. Lakin mənbələrin sözlərinə görə, eyni prinsipi təkrar edən mexanizmin yaradılması ciddi çətinliklərlə müşayiət oluna bilər.
Alternativ yanaşma kimi ABŞ-ın öhdəliklərinə, eləcə də Böyük Britaniya və Fransanın əvvəlcədən razılaşdırılmış planlarına əsaslanan model nəzərdən keçirilir. Bu planlarda “dəstək qüvvələrinin ayrılması”, monitorinq mexanizmlərinin tətbiqi və “hava örtüyünün təşkil edilməsi” nəzərdə tutulur.
Bloomberg-in yazdığına görə, sözügedən təhlükəsizlik paketinin detallarının müəyyənləşməsi həm ABŞ administrasiyasının, həm də Avropa paytaxtlarının mövqeyindən asılı olacaq.
Bundan əvvəl, Rusiya və ABŞ prezidentlərinin Alyaskada baş tutan sammitindən sonra The Economist-in müxbiri mənbəyə istinadla “havada atəşkəs” barədə ilkin razılaşmanın əldə edildiyini iddia etmişdi.
Ekspertlər hesab edirlər ki, Ukrayna üçün nəzərdə tutulan təhlükəsizlik zəmanətlərinin formatı həm münaqişənin gedişatına, həm də Qərb dövlətlərinin Rusiyaya qarşı siyasi iradəsinin möhkəmliyinə birbaşa təsir göstərəcək.
Poliqon.info
