Azərbaycan batut gimnastikası məktəbi beynəlxalq arenada getdikcə daha inamlı təsir bağışlayır. Keçən il Selcan Mahsudova Parisdə keçirilən Yay Olimpiadasında debütla əsl sıçrayış əldə edi. Ölkəmiz Oyunlarda bu idman növündə ilk dəfə idi təmsil olunurdu.
İdman.biz-ə müsahibəsində batut komandasının baş məşqçisi Vladimir Şulikin komandanın böyük planlarından bəhs edib:
- Ayın əvvəlində Bakıda müxtəlif ölkələrdən beynəlxalq ekspertlərin rəhbərliyi altında məşq edən gənc idmançıları bir araya gətirən Avropa Gimnastikasının təşkil etdiyi Batut Gimnastikası düşərgəsi keçirildi. Bunun sizə və komandamıza təsiri necə oldu?
- Düşərgə çox səmərəli keçdi, gənc idmançılarımız və məşqçilərimiz bunu bəyəndi. Çoxlu komandalar, təcrübəli mütəxəssislər gəldi və təlim-məşq toplanışı interaktiv şəkildə baş tutdu. Burada özüm üçün də çoxlu yeni şeylər öyrəndim. Yeni başlayan idmançılar üçün istifadə olunan proqramları, müxtəlif hazırlıq elementlərini xatırladım. Beləliklə, bu, ən yüksək səviyyədə oldu və ümid edirəm ki, bu cür düşərgələr hər il və ya ən azı iki ildə bir dəfə keçiriləcək.
- Qeyd etdiniz ki, düşərgə təkcə təlimlə deyil, həm də əcnəbi həmkarlarla fikir mübadiləsi və müzakirələrlə yadda qaldı. Bu mənada, deyə bilərsinizmi, bu gün batut gimnastikasının inkişaf vektorları hansılardır?
- Təbii ki, idmanımızı bölgələrdə daha çox inkişaf etdirmək istərdik. Amma ölkə əhalisinin əksəriyyəti Bakıda və ona yaxın ərazilərdə cəmləşdiyindən bura cəlb olunanların axını daha çoxdur. Burada oğlanları işə götürmək daha asandır. Əsas vəzifə yeni məşqçilərin hazırlanmasıdır, bununla bağlı yeni proqram hazırlanır. Mütəxəssislər təlim kurslarında iştirak edə və sonra işə başlaya biləcəklər.
- Ümumiyyətlə, gənc nəsilimizin batut gimnastikasına marağı necədir? Yəni bölmələrə cəlb olunanların və gələnlərin sayı sizi qane edirmi?
- Maraq çoxdur, amma biz həmişə daha çox istəyirik ki, idmançılar, valideynlər bizi tanısınlar. Selcan Mahsudovanın Olimpiadada iştirak amili bu mənada böyük təkan oldu, batut gimnastikasına maraq xeyli artdı. Yenə də bəhrəsini verəcək. Biz hətta hazırda daha çox idmançı olan ölkələrlə də uğurla yarışırıq.
- Milli komandadan danışaq. Mövsümün ikinci yarısına hazırlıq necə gedir, harada yarışacaqsınız?
- MDB Oyunları bizim əsas startımız olacaq. Oğlanlardan ibarət komanda hələ müəyyənləşir, qızlar komandası isə artıq bəllidir. Əsas rəqiblərimiz Belarus, Rusiya, Qazaxıstan və Özbəkistandır. Dəvətlə daha bir neçə ölkə gələcək. Qızların batut gimnastikasında Türkiyəni fərqləndirmək olar. Təbii ki, ümidlərimiz var, medallara və uğurlu çıxışa ümid edirik. Biz dünya kubokunda da mübarizə aparacağıq, daha sonra bütün diqqətimizi noyabrda Pamplonada keçiriləcək dünya çempionatına hazırlaşacağıq.
Gənclərin də müəyyən şansları var. 15-16 yaş kateqoriyası üzrə dünya çempionatı olacaq - bu yarışlar ikinci dəfə keçiriləcək və hələ orada heç bir mükafatımız olmayıb. Digər yaş qruplarında da uğurlu çıxışlar üçün imkanlar var. Yaxşı xəbər budur ki, əgər 10 il əvvəl biz yarışlara beş-altı idmançıdan ibarət komandalar aparırdıqsa, indi onların sayı 30-a yaxındır. Biz işləməyə davam edəcəyik və liderlərə yaxınlaşacağıq.
Yeri gəlmişkən, idmançılarımız beynəlxalq arenada mini batut proqramında da mübarizə aparacaqlar. Biz onu inkişaf etdirməyə başlamışıq və bu tip batut üçün məsul məşqçi var.
- Selcan Mahsudovadan söz düşmüşkən, proqramın mürəkkəbləşdirilməsi istiqamətində işlər necə gedir? Onun indiki forması necədir?
- Selcanın hazır proqramı var və onu Portuqaliyada keçirilən dünya çempionatında nümayiş etdirib. O, üç dəfə salto etdi və hazırda bu elementi dünyada yalnız iki idmançı yerinə yetirir. Deyim ki, indi artıq Mahsudova bir az qorxub. Və o, Paris Olimpiadasına çətin seçimdən keçərək, son anda lisenziya qazanıbsa, indi hər şey plana uyğun getsə, Selcan vəsiqəni çox asanlıqla əldə edə bilər. Sadəcə, texnikasını bir az da təkmilləşdirməli və psixoloji cəhətdən hazır olmalıdır. O zaman qarşımıza Olimpiya medalları uğrunda mübarizə aparmaq vəzifəsini qoyacağıq. Formaya gəlincə, əgər Mahsudova yaxşı formadadırsa və zədələr onu narahat etmirsə, deməli, o, çox şeyə qadirdir.
- Ümumiyyətlə, dünya çempionatı ilə bağlı hədəfləriniz nədir?
- Uğurlu çıxışa ümid edirik. Biz tamblinq komandasına - hazırkı dünya çempionlarımıza da ümid edirik. Uşaqlar özlərini göstərməli və medal qazanmalıdırlar.
Zəki Feyzullayev
İdman.biz
